O‘zbekiston davlat san’at va madaniyat instituti professional ta’lim sohasida faoliyat ko‘rsatuvchi, davlat akkreditatsiyasidan o‘tgan, bitiruvchilarga bakalavriat va magistratura bosqichlarida ta’lim beradigan davlat tasarrufidagi oliy o‘quv yurtidir.

  Institut O‘zbekiston Respublikasi Prezidentining 2012-yilning 4-iyundagi PQ-1771-sonli qaroriga asosan Toshkent davlat madaniyat instituti va O‘zbekiston davlat san’at instituti  negizida tashkil etilgan.

  Institut madaniyat va san’at sohasiga bevosita aloqador bo‘lgan bir qancha tor mutaxassislik yo‘nalishlari bo‘yicha mutaxassislar tayyorlovchi o‘ziga xos oliy ta’lim muassasasi hisoblanadi.O‘quv yurtida ta’lim berish jarayonida fan va san’at, ijodiy faoliyat va amaliy texnologiyalar uyg‘unlashgan holda olib boriladi. Institutning quyidagi 4 fakulteti va 21 kafedrasida talabalar ta’limning 26 ta yo‘nalishi va 19 mutaxassisligi bo‘yicha O‘zbek va rus tillarida tahsil oladilar.

Fakultetlar:

• Teatr san’ati fakulteti;
• Kino;
• televideniye va radio san’ati fakulteti;
• Xalq ijodiyoti fakulteti. 

  Institut aktyorlik mahorati va rejissura, san’atshunoslik va teatrshunoslik, ovoz rejissyorligi va operatorlik mahorati, xalq ijodiyoti, madaniyat va san’at muassasalarini boshqaruv, kutubxona-axborot faoliyati kabi soha mutaxassislarini tayyorlaydi.

  Bugungi kunda institutda 5380 dan ortiq talaba bakalavr ta’lim yo‘nalishlari va magistratura mutaxassisliklari bo‘yicha tahsil olyapti. Bugungi kunda institutda faoliyat yuritayotgan 336 nafar professor-o‘qituvchining 52 nafari fan doktori, professor, 93 nafari fan nomzodi, dotsent hamda faxriy unvonlar bilan taqdirlangan 40 dan ortiq pedagog ta’limning yuqori darajada bo‘lishini ta’minlab kelmoqda.

  Talaba va professor- o‘qituvchilar institutning boy axborot-resurs markazidan foydalanib kelmoqdalar. Unda 100 mingdan ziyod adabiyot mavjud. ARM fondida institut professional faoliyatiga doir bo‘lgan nodir va kamyob nashrlar ham mavjud. Institutda elektron ta’lim resurslarini yaratish bo‘yicha ham ishlar yo‘lga qo‘yilgan.

 Bundan tashqari institut hududida o‘quv binosi, institut ma’muriyati binosi, sport majmuasi, yopiq suzish havzasi, ochiq sport maydonchalari, 2 ta TTJ joylashgan.

   O‘zbekiston davlat san’at va madaniyat instituti xalqaro aloqalari oxirgi yillarda jadal rivojlanmoqda. Institut bir qator memorandumlar imzolagan Jumladan, Turkiya, Rossiya, Qirg‘iziston va Janubiy Koreyaning OTMlaridir. Mazkur Xorijiy OTMlar bilan professor-o‘qituvchilar va talabalar almashinuvi yo‘lga qo‘yilgan.

  Bugun o‘zbek san’ati rivojiga hissa qo‘shib kelayotgan xalqimiz qalbidan joy olgan O‘zbekiston xalq artistlari D.Obidovna, M. Ismoilov, M. Xoliqova, F. Zokirov, O. Otajonov, N. Abdullayeva, M. To‘xtasinov, R. Sultonova, O‘zbekistonda xizmat ko‘rsatgan artistlar G‘. Boytoyev, F. Solihova kabi san’atkorlarimiz O‘zbekiston davlat san’at institutini tamomlagan.

     Agar sizda institut haqida taklif yoki murojaat tug‘ilgan bo‘lsa, quyidagi manzilga va raqamlarga murojaat qilishingiz mumkin:

• Manzil: O‘zbekiston Respublikasi, Toshkent shahri 100164, Yalang‘och dahasi 127 «a» uy;
• Telefon: (8-371) 230-28-15;
• Faks: (8-371) 230-28-15;
• Mo‘ljal: Mirzo Ulug‘bek tumani soliq inspeksiyasi, Lokomotiv bog‘i;
• Transport: Avtobuslar – 63, 129; Marshrutkalar: 80, 95, 137, 181, 192.

  Bizni kuzatishda davom eting Ta’lim telekanali ta’limdagi eng so‘nggi yangiliklarni har doim siz bilan bo‘lishishga tayyor! 

                                                    Ma’mura To‘rayeva tayyorladi