Тошкент архитектура-қурилиш университети

Орқага

Олийгоҳлар 08/01/2025 Тошкент архитектура-қурилиш университети

Мустақил Ўзбекистон Республикаси ўзининг шонли ва шарафли тарихи даврида жаҳонга намуна қилиб кўрсата оладиган бир қанча тараққиёт босқичларини босиб ўтди. Шу жумладан, иқтисодиёт, сиёсат, фан, таълим, спорт, саноат, қишлоқ хўжалиги каби бир қанча соҳаларда улкан муваффақиятларга эришди. Айниқса, ҳозирги кунда қурилиш соҳаси Ватанимизнинг ҳар бир ҳудудида барқарор суръатлар билан жадал ривожланиб келмоқда.

Шахсан Ўзбекистон Республикасининг биринчи президенти И.А.Каримовнинг ташаббуси билан улкан ишлаб чиқариш корхоналари, кўркам ва замонавий турар-жой бинолари, маданий-маиший объектлар, ҳайбатли кўприклар ва йўллар қурилган. Бу фаолиятни самарали амалга ошириш учун меъморчилик ва қурилиш соҳасида чуқур билимга эга бўлган меъмор, қурувчи ҳамда муҳандисларга бўлган эҳтиёж сезиларли даражада юқори бўлганлиги сабабли Тошкент архитектура қурилиш институти ташкил этишга эҳтиёж туғилган.

Ҳозирги вақтда бу жараёнда жонбозлик кўрсатаётган Тошкент архитектура қурилиш институти Ўзбекистон Республикасининг биринчи президенти И.А.Каримовнинг 1991 йил 6 майдаги фармонига биноан Тошкент политехника университетининг “Архитектура”, “Саноат ва фуқаро қурилиши” ҳамда “Муҳандис қурилиши” факультетлари негизида ташкил этилган. Шуни алоҳида таъкидлаш зарурки Тошкент архитектура қурилиш университети архитектура ва қурилиш соҳасида таянч олий таълим муассасаси ҳисобланиб, таълим йўналишлари ва мутахассисликлар учун давлат таълим стандартлари, намунавий ўқув режалар, фан дастурлари ишлаб чиқишга ҳамда республика олий таълим муассасаларида татбиқ этишда доимо ташаббус кўрсатиб келмоқда.

2022 йил 8 ноябрда Тошкент архитектура-қурилиш институти университети сифатида қайта ташкил этилиб, у муҳандислик, архитектура, қурилиш ҳамда қурилиш материаллари технологиялари йўналишларига ихтисослаштирилади.

Бугунги кунда университетда “Архитектура”, “Бино ва иншоотлар қурилиши”, “Муҳандислик қурилиш инфраструктураси” ва “Қурилишни бошқариш” факультетлари мавжуд бўлиб, уларда “Дизайн”, “Архитектура”, “Кўчмас мулк экспертизаси ва уни бошқариш”, “Қиймат инжиниринги”, “Геодезия, картография ва кадастр”, “Бино ва иншоотлар қурилиши”, “Муҳандислик коммуникациялари қурилиш ва монтажи”, “Гидротехника қурилиши” каби 22 та таълим йўналиши бўйича 3958 нафарга яқин бакалаврлар ҳамда “Дизайн”, “Геодезия ва картография”, “Бино ва иншоотлар архитектураси”, “Архитектура назарияси ва тарихи, архитектура ёдгорликларини тиклаш”, “Ландшафтлар архитектураси”, “Бино ва иншоотлар қурилиши”, “Қурилишни ташкил этиш технологияси”, “Қурилиш иқтисодиёти”, “Гидротехника иншоотлари”, “Кўчмас мулкни баҳолаш ва бошқариш” каби 23 та мутахассислик бўйича 349 нафарга яқин магистрлар тайёрланмоқда.

Тошкент архитектура-қурилиш университетида ҳозирда қуйидаги факультетлар мавжуд:

Муҳандислик факультети;
Технология факультети;
Архитектура факультети;
Менежмент факультети.

Бугунга қадар университетида турли соҳалар бўйича 35 мингдан ортиқ мутахассислар тайёрланди ва улар мамлакатимизнинг архитектура, қурилиш ва бошқа соҳаларни кадрлар билан таъминлашга ўз ҳиссасини қўшмоқда.

Бу кадрлар етарлича билим эгалари, малакали мутахассислар бўлишлари учун кўп жиҳатдан ўз соҳасини мукаммал билган, ўз касбини севган профессор-ўқитувчиларга боғлиқдир. Институт раҳбарияти профессор-ўқитувчилар илмий салоҳиятини оширишга жиддий эътибор бермоқда. Ёш кадрлардан илмий даражали ва илмий унвонли, малакали педагогларни тайёрлаш кафедра ва деканатлар диққат марказида турибди. Тошкент архитектура қурилиш университетида 343 нафар профессор-ўқитувчилар фаолият юритиб, улардан 23 нафари фан докторлари ва профессорлар, 102 га яқини фан номзодлари ва доцентлар талабаларга таълим-тарбия бермоқдалар. Институт профессор-ўқитувчиларининг 36% илмий даража ва илмий унвонларга эга.

Университет профессор-ўқитувчилари томонидан чоп этилган ишларга Web of Science, Scopus, Google Scholar тизимларида 650 дан ортиқ иқтибослик мавжуд. Университет ташкил этилгандан бери, архитектура ва қурилиш соҳаси мутахассисларини тайёрлашнинг долзарб муаммолари бўйича 20 дан ортиқ халқаро конференциялар ўтказилган.

Ҳозирги кунда қурилиш соҳасидаги талаб ва эҳтиёжлардан келиб чиқиб, Тошкент архитектура-қурилиш университетида (ТАҚУ) 22 та бакалавриат таълим йўналишлари ва 23 та магистратура мутахассисликлари бўйича кадрлар тайёрлаш йўлга қўйилган.

Тошкент архитектура-қурилиш университетида 2023-2024 ўқув йили учун жами 3646 та қабул квота ўринлари ажратилган бўлиб, жумладан: бакалавриат таълим йўналишлари учун 3300 та ва магистратура мутахассисликлари учун 346 та ўрин ажратилган. Бакалавриат босқичи учун ажратилган 3300 та ўриндан 940 таси кундузги, 350 таси сиртқи, 1050 таси кечки, 490 та иккинчи ва ундан кейинги олий таълимнинг кундузги ҳамда 245 та иккинчи ва ундан кейинги олий таълимнинг сиртқи шакллари учун қабул параметрлари ажратилди.

Шунингдек, Қуролли кучлар сафида муддатли ҳарбий хизматни ўтаб, ҳарбий қисм қўмондонлигининг тавсияномалари учун 47 та, 5 йил стажга эга хотин-қизлар учун 5 та, “Меҳрибонлик уйи” ва “Болалар шаҳарчаси”нинг битирувчилари учун 24 та ҳамда “Ногиронлиги бўлган шахслар” учун 47 та ўрин ажратилган.

Университет мутахассислари томонидан қурилиш, жамоат ва турар-жой биноларини лойиҳалаш, бино ва биноларнинг зилзилаларга чидамлилигини аниқлаш, техноген чиқиндилар асосида юқори сифатли қурилиш материаллари ишлаб чиқариш учун буюртмалар қабул қилинади. Институтнинг нашриёт-таҳририят бўлими томонидан дарсликлар, ўқув-услубий қўлланмалар, монографиялар ва илмий ишлар тўпламлари нашр этилган.

Тошкент архитектура-қурилиш университети МДҲ, Осиё ва Европанинг 20 дан ортиқ етакчи институт ва университетлари билан шартномалар тузган. Жумладан хорижий давлатларнинг жами 95 та нуфузли ОТМлари таълим ва илмий ҳамкорлик алоқалар ўрнатган ҳамда Германия, Франция, Италия, Корея Республикаси, Хитой Халқ Республикаси, Малайзия, Япония, Россия Федерацияси, Белоруссия, Озарбайжон, Туркманистон, Тожикистон ва Қозоғистон каби республикаларнинг қатор нуфузли олий таълим ва илмий муассасалари билан ҳамкорлик қилиб келмоқда.

Университетда қатор халқаро грантлар мавжуд. Жумладан, Италиянинг Турин политехника университети, Германиянинг Ваймар-Баухаус университети, Полшанинг Белосток техника университетлари билан ҳамкорликда Erasmus+ дастури лойиҳалари, Германиянинг Потсдам амалий фанлар университети билан ҳамкорликда DAAD дастури лойиҳалари амалга оширилмоқда.

Бугунги кунда университетда МДҲ давлатлари, Туркия, Афғонистон фуқаролари архитектура, қурилиш, менежмент йўналишларида таҳсил олмоқдалар.

Университетда профессор-ўқитувчилар ва талабалар учун майдони 1075,2 м2 бўлган ахборот-ресурс маркази интернет тармоғига уланган замонавий компьютерлар ҳамда 247 958 дона электрон китоб фонди мавжуд. Университетда спорт билан шуғулланиш учун “Пахтакор” спорт мажмуаси, ҳудудлардан келган талабалар учун ётоқхона, университетнинг асосий биносида ошхона ҳамда факультетларда буфетлар мавжуд.