Тахминан 9-10 йилларча олдин ёшлар билан турли мавзуларда миллий кутубхонада дебатлар ўтказардик. Юзлаб ёшлар, инглиз тили бўлсин, рус тили, корейс тили ҳатто япон тилидан ҳам жуда юқори даражада мулоқот қила олишар эди. Вақти-вақти билан, ҳаттоки кутубхонанинг биринчи қаватдаги залига сиғмас эдик... 

Яқинда эслаб, таҳлил қилсам шу клубга аъзо бўлган аксарият ёшлар дунёнинг нуфузли университетларида таълим олишди, катта хорижий корхона ва ташкилотларда ҳозирда ишлаб келишмоқда. Энг муҳими улар жамоаларининг қон томири ёки асосий етакловчисига айланишган. 

Менимча бундай табиий лидерларни тарбиялаб берган клубни такрорлаш қийин, аммо яқинда бир катта янгиликка кўзим тушиб қолди ва жуда суюндим.

"Ибрат фарзандлари" лойиҳасининг "Ибрат debate" клуби лидери Азизбек дунёнинг топ олийгоҳларидан бири бўлган Гарвард олийгоҳида ўқиш учун 100 фоизлик грант ютиб олди. (тасаввур қилаяпсизми, $400К, тўрт юз минг доллардан кўпроқ грантни Азизбек ютиб олган). Бу шунчаки хайратланарли. Қойил, Азизбек. Ота-онанингизга, устозларингизга раҳмат. 

П.С. Маълумот учун: Ҳозирда Ёшлар ишлари агентлиги Ўзбекистонлик ёшларни Гарвард,  Кембридж, Оксфорд ва бошқа шу каби топ олийгоҳларга йўналтириш учун "Топ 100" лойиҳаси доирасида уларни ўқишга тайёрлаб, юбормоқда.

Мактаб битирувчилари ҳам мазкур лойиҳаларда иштирок этиб,  нуфузли олийгоҳ талабалари бўлиши мумкин. Бу лойиҳада иштирок этиш эса мутлақо бепул!

Манба: https://t.me/alisher_sadullaev/4898