Таълим ва тиббиёт муассасалари боғ ва ерларини хусусийлаштириш тақиқланиши кутилмоқда
Расм сунъий интеллект ёрдамида яратилган
Ўзбекистонда давлат таълим ва тиббиёт ташкилотлари балансидаги боғлар ҳамда ер майдонларини хусусийлаштиришни тақиқлаш қонун билан мустаҳкамланиши кутилмоқда. Бу чоралар Президент фармони билан тасдиқланган миллий дастурлар доирасида кўрилади.
Президент фармони билан 2027–2031-йилларда амалга ошириладиган 7 та миллий дастур ва уларнинг чора-тадбирлар режаси тасдиқланган. Устувор йўналишлардан бири сув ресурслари ва табиатга муносабатни туб ўзгартириш бўлиб, «Яшил макон» умуммиллий лойиҳасини янги босқичга олиб чиқиш назарда тутилган.
Мактаб ва шифохона ҳудудлари ҳимояланади
Қонун ҳужжатларига барча давлат таълим ва тиббиёт ташкилотлари ҳудудида жойлашган ҳамда уларнинг балансидаги боғлар ва ер майдонларини хусусийлаштиришни тақиқловчи қўшимча ва ўзгартиришлар киритиш кўзда тутилган. Бунга оид қонун лойиҳаси 2027-йил 20-январгача ишлаб чиқилади.
Таълим муассасалари учун бу муҳим аҳамиятга эга: мактаб ва ОТМ ҳудудидаги яшил майдонлар келгусида хусусий эгаликка ўтказилмаслиги керак. Очиқ ҳаводаги боғлар ўқувчилар ва талабалар учун дам олиш ҳамда ўқиш учун қулай жой бўлиб хизмат қилади.
Яшилликни кенгайтириш режалари
Шунингдек, туман ва шаҳар марказларида яшил ҳудудлар кўламини 30 фоизга етказиш кўзда тутилган. Бу ишларга Экология ва иқлим ўзгариши миллий қўмитаси, Ўрмон ва яшил ҳудудларни кўпайтириш, чўлланишга қарши курашиш агентлиги, Қорақалпоғистон Республикаси Вазирлар Кенгаши ҳамда вилоят ва Тошкент шаҳар ҳокимликлари масъул этиб белгиланди.
Сув тежовчи технологиялар қишлоқ хўжалиги экин майдонларида 100 фоиз қамраб олиниши режалаштирилган. 2026-йил декабригача сув тежовчи суғориш технологияларини жорий этишнинг 5 йиллик манзилли дастури ва субсидияларни самарадорлик асосида қайта кўриб чиқиш назарда тутилган президент қарори лойиҳаси ишлаб чиқилади.
Эслатиб ўтамиз, 2026-йил мартда имзоланган «Яшил макон» фармонида ботаника ва дендрология боғлари ер участкаларини хусусийлаштириш ёки бегоналаштириш, уларнинг ҳудудини қисқартириш қатъий тақиқланиши белгиланган эди.
Манба: Президент фармони
