Бугун, 30 майдан бошлаб, эҳтиёжманд оилалардаги 2 минг нафар хотин-қизларга қўшимча қабул кўрсаткичлари доирасида ажратиладиган тавсияномалар бериш учун аризалар қабули бошланди.

Аввалроқ, ушбу тавсияномага талабгорларнинг 6 та мезони ҳақида маълумот берилган эди. Аризалар tavsiyanoma.ijro.uz платформаси орқали электрон шаклда қабул қилинади.

Талабгорларнинг аризалари 8 июнга қадар қабул қилинади.

Аризалар 10 июнга қадар туман (шаҳар) Ишчи гуруҳлари томонидан ўрнатилган тартибда кўриб чиқилади.

Тавсиянома электрон шаклида 15 июнга қадар ўрнатилган тартибда ўз эгаларига етказилади.

Мазкур тавсиянома бир йил муддатга берилади. Ўтган йили тавсиянома олган, лекин ўқишга кира олмаган хотин-қизлар жорий йилда тавсиянома олиш учун яна қайта мурожаат қилишлари керак бўлади.

Маълумот учун: бу тавсиянома ҳеч қанақа балл қўшиб бермайди. Кўпчилик тавсиянома олсам 4% балл қўшилади, деб хато тушунади.

Бундан ташқари, хотин-қизлар тавсияномаси бор абитуриентлар 100% ўқишга киради, дегани эмас. Бунинг учун етарли балл ҳам олиш керак эди.

Шунингдек, мутахассислиги бўйича камида 5 йил меҳнат стажи мавжуд олий маълумотга эга бўлмаган хотин-қизлар 500 та квота учун жорий йилнинг 1 июнига қадар (шу куни ҳам) ариза билан яшаш жойидаги туман (шаҳар) Ишчи гуруҳларига мурожаат этишлари лозим.

Бу иккита тавсиянома бошқа-бошқа бўлиб, бир киши иккала тавсияномани ҳам олиши мумкин.