Ташаббус 3 асосий йўналишда амалга оширилади:

Ал-Беруний халқаро мактаби – унга юртимиз бўйлаб энг иқтидорли ўқувчилар саралаб олинади. Улар учун дунёнинг илғор тажрибалари асосида юқори даражада таълим берилади. Дарсларни хориждан жалб қилинган малакали устозлар олиб боради.

“Президент иқтидорли фарзандлари” миллий дастури – унга Ўзбекистон бўйлаб 3 000 нафар иқтидорли ўқувчи танлаб олинади ва олий ўқув юртларига кириш учун зарур бўлган билим ва кўникмалар билан қуроллантирилади. Ҳар йили “Ренессанс” оромгоҳида хорижий устозлар билан 3 ҳафталик интенсив сессиялар ташкил этилади. Ушбу икки йўналишдаги ўқувчилар Harvard, Yale, Princeton, UPenn, Cornell каби етакчи университетларга қисқа муддатли курсларга юборилади. Агар улар шу университетларга ўқишга қабул қилинса, “Эл-юрт умиди” жамғармаси ўқиш харажатларини молиялаштиради.

Президент иқтидорли ёшларни қўллаб-қувватлаш ҳамжамияти – у мамлакатнинг энг салоҳиятли интеллектуалларини бир жойга жамлайди. Уларга Ўзбекистондаги ислоҳотларда бевосита иштирок этиш, ўз ғоялари ва ташаббусларини илгари суриш имконияти яратилади. Ҳамжамият аъзолари вазирликлар, идоралар ва йирик компаниялар билан бевосита мулоқотда бўлади.

Азиз ёшлар, азиз ватандошлар, энди сиз кузатувчи эмас, бу тарихий жараённинг фаол иштирокчиси бўлишингиз мумкин.

Агар сиз тажрибали IT ёки халқаро алоқалар мутахассиси бўлсангиз ёки “ТОП-100” университетда таҳсил олиб, ушбу олийгоҳларга кириш борасида билим ва тажрибангиз билан бошқаларга йўл кўрсата олсангиз Биз айнан сизни қидиряпмиз!

Сафимизга қўшилишни истасангиз, ўзингиз ҳақингиздаги маълумотларни илова қилган ҳолда @uzedu_vazirbot манзилига юборинг, таклифларингизни ҳам йўллашингиз мумкин.