Mukofot qiymati 525 million so‘m bo‘lgan “Yil o‘qituvchisi”  ko‘rik tanlovining birinchi bosqichi g‘oliblari 2025-yil avgust-dekabr oylarida o‘tkaziladigan toifa testlari natijasida aniqlanadi.

Hukumat qarori bilan tasdiqlangan Nizomga ko‘ra, “Yil o‘qituvchisi” tanlovida oliy yoki birinchi malaka toifasiga hamda kamida 5-yillik pedagogik stajga ega, asosiy shtatda faoliyat yuritayotgan fan yoki boshlang‘ich sinf o‘qituvchisi ishtirok etishi mumkin.

Tanlov uch bosqichda o‘tkaziladi:

birinchi bosqichda — nomzodlarning mutaxassislik fani, pedagogik mahorati va kasb standarti bo‘yicha nazariy bilimlari baholanadi;

ikkinchi bosqichda — nomzodlarning pedagogik mahorati baholash mezonlari asosida hakamlar hay’ati hamda pedagoglar tomonidan baholanadi. Bunda nomzod o‘tgan darsning videoyozuvi baholash uchun maxsus platformaga joylashtiriladi;

uchinchi bosqichda — nomzodlarning ma’naviy-ma’rifiy faoliyati hamda kitobxonligi baholanadi.

Tanlov yakunlariga ko‘ra, har ikki yilda bir marta oktyabr oyida g‘olib deb topilgan har bir nomzod reyestri Vazirlik tomonidan yuritiladigan hamda Vazirlikning rasmiy veb-saytiga joylashtiriladigan QR-kodli sertifikat bilan taqdirlanadi.

Ushbu sertifikat asosida g‘oliblar Maktabgacha va maktab ta’limi vaziri jamg‘armasiga qo‘shimcha ajratilgan mablag‘larni qayta taqsimlash hisobidan bazaviy hisoblash miqdorining 1 400 baravariga teng pul mukofoti (taxminan 40 ming AQSH dollari) bilan taqdirlanadi.

Endilikda, toifa testlarida )pedagoglar attestatsiyasi) qayd etilgan yuqori natijalar orqali quyidagi imkoniyatlarga ega bo‘lish mumkin:

• 1. Amaldagi malaka toifasini oshirish yoki tasdiqlash ( bu orqali keyingi besh yil davomida majburiy attestatsiyadan ozod qilinish hamda yuqori toifa bo‘yicha oylik olish).
• 2. Keyingi 2-yil davomida 70 foizlik ustama olish ( agarda 86 va undan yuqori ball to‘plab oliy yoki birinchi toifaga olinsa yoki saqlansa).
• 3. Vazir jamg‘armasidan to‘lab beriladigan ustamalar (57 mln.so‘mdan ortiq) uchun o‘tkaziladigan saralashning birinchi bosqichidan o‘tgan hisoblanish ( bu uchun esa o‘z fani bo‘yicha o‘tkazilgan toifa testlarida o‘z tumanida o‘z yo‘nalishi bo‘yicha 1-9 o‘rinlarda bo‘lish).
• 4. “Yil o‘qituvchisi” ko‘rik tanlovining birinchi bosqichidan o‘tgan hisoblanish (bu uchun esa toifa testlarida o‘z tumanidagi barcha o‘qituvchilar orasida 1-3 o‘rinlarda bo‘lish).