Ҳужжат топшираётганда нега йўналиш танлаяпмиз? Тестдан кейин бошқа йўналишни танлай олмаймизми?

Бу каби саволлар ўтган йили ҳам кўп берилганди, жорий йилда ҳам такрорланяпти.

УзБМБ сайтидан рўйхатдан ўтаётганда "фанлар мажмуасини танлаш" деган жойни боссангиз, сизга йўналишлар рўйхатини чиқариб беради. Шу сабабли кўпчилик "биз йўналиш танлаяпмиз" деб ўйлаб, адашяпти.

Аслида ўтган йилдан бошлаб, биринчи босқичда йўналиш эмас, шунчаки фанлар мажмуаси танланади. Яъни сиз қайси фандан имтиҳон топширишингизни белгилайсиз холос. Тестлар тўлиқ якунлангач эса, ўша фанларга мос келадиган бешта йўналишни танлайсиз. Бунда йўналиш танлашда ҳеч қанақа чеклов йўқ, асосийси фанлар мажмуасига тўғри келса бўлди.

❓Унда нега рўйхатдан ўтишда йўналиш чиқяпти? 

Бу масалани ўтган йили ҳам кўтаргандим.

Балки агентлик фанлар мажмуасини танлашда абитуриентларга осонроқ бўлсин, мўлжал олишга қийналишмасин, деган мақсадда шунақа қилган бўлса керак.

Аслида техник жиҳатдан чалғитмайдиган бошқача йўл қилиш керак эди. Яъни абитуриентлар рўйхатдан ўтишда дастлаб биринчи фанни, кейин иккинчи фанни танлаши керак, рўйхатда ҳам фақат мавжуд фанлар номи чиқиши керак эди.

Фанларни танлаб бўлгач, пастда шу фанларга мос келадиган йўналишларнинг тўлиқ рўйхати чиқиши мақсадга мувофиқ бўлар эди. Шунда абитуриентда тўлиқ тасаввур пайдо бўларди. Ҳозирги усул эса, ростдан чалғитяпти.

Бундан ташқари рўйхатдан ўтиш чоғида қайси фанлар мажмуаси қайси йўналишга тўғри келишини осон текшириб оладиган имконият ҳам бўлиши керак. Бунинг учун албатта Telegram каналларга ўтиб, қайсидир файлни кўчириб олиб қараши шарт эмас.

Ўтган йили шошилинч ўзгаришлар бўлганига улгуришмагандир, деб яхши гумонда бўлгандик, лекин жорий йилда ҳам ҳеч нарса ўзгармаган. Агентликда бир йил давомида қулайроқ ва тушунарлироқ алгоритм ўйлаб топишга вақт бор эди.

‼️ХУЛОСА: рўйхатдан ўтишда танлаётган йўналишингизнинг ҳеч қандай аҳамияти йўқ. Ҳозир асосийси фанлар мажмуасига қарашингиз керак. Тест якунлангач, исталган йўналишни танлашингиз мумкин бўлади. Ҳаттоки рўйхатдан ўтишда белгилаган йўналишингизни умуман танламасликка ҳам ҳаққингиз бор.

Масалан, юқоридаги расмда мен "Бухгалтерия ҳисоби" деган йўналишни танладим ва математика-чет тили фанлари чиқиб келди. Тест тугагач, мен математика-чет тилига мос келадиган бешта йўналишни танлайман, бунда айнан бухгалтерияни танлашим шарт эмас.