❓ Тестга оқ кўйлакда ёки шу каби бирор қатъий формада келиш шартми?

✅ ЖАВОБ: йўқ, шарт эмас. Кийимга чеклов қўйилмаган. Ўзингизга қулай бўлган рангдаги, услубдаги (масалан, спортча) кийимда келаверинг. Ва яна салгина маданият доирасида шортикда, шиппакда, майкада келмасликка ҳам фаросатингиз етади, деган умиддамиз.

❓ Тестга кириш учун қандай ҳужжат олиб бориш керак?

✅ ЖАВОБ: Тест синовларига кириш учун фақат паспорт (ИД-карта) ва қоғозга чоп этилган «Абитуриент рухсатномаси» бўлса кифоя. Рухсатномани шахсий кабинетингиздан ёки my.uzbmb.uz/allow/bachelor-allow манзилидан юклаб олишингиз мумкин. Рухсатномани телефонда кўрсатиш ҳисобмас, албатта қоғозга чоп этиш керак.

❓Паспорт ёки ИД-картанинг электрон версиясини кўрсатса бўладими?

✅ ЖАВОБ: Йўқ, бўлмайди. Албатта ҳужжатнинг оригинали ёнингизда бўлиши керак.

❓Тестга қанақа рангдаги ручка олиб бориш керак?

✅ ЖАВОБ: Ҳеч қанақа! Тест синовларига ўзингиз билан ручка олиб келишингиз шарт эмас, олиб келганингиз билан барибир қўйишмайди. Ичкарида ручка ҳамда сув берилади.

❓Тестга егулик ёки сув олиб киришга рухсат бериладими?

✅ ЖАВОБ: Йўқ, рухсат берилмайди. Ичкарида сув тарқатилади. Егуликка келсак, тестда 1-2 соат олдин нимадир тановул қилиб олишингиз керак. Ва имкон қадар бу қоринни оғритмайдиганроқ егулик бўлсин. Оч қорин билан тестга кирманг! Бу натижангизга салбий таъсир қилиши мумкин.

❓ Тестга соат олиб киришга рухсат бериладими?

✅ ЖАВОБ: Ҳа, берилади. Фақат асосий шарти соатингиз оддий механик соат бўлиши керак. Электрон ҳамда смарт-соатларга рухсат берилмайди.

❓ Ўқишга кира олмаганларга тўлаган пулини қайтариб бериладими?

✅ ЖАВОБ: йўқ, қайтариб берилмайди. Аввалги йили битирганлардан олинган 187 минг 500 сўм — бу тестга кириш учун эди. Ўқишга киролмаганларга бу пул қайтарилмайди.