Тошкентдаги Муҳаммад ал-Хоразмий номидаги ихтисослаштирилган мактабда илк бор Silk Road University Fair халқаро таълим форуми ва кўргазмаси бошланди. Икки кунлик тадбирда 10 дан ортиқ давлатдан 40 дан ортиқ университет вакиллари қатнашди.

Кўргазмада Австралия, Буюк Британия, Германия, Канада, АҚШ, Франсия, Хитой, Испания ва бошқа давлатларнинг таълим муассасалари ўз дастурларини тақдим этди. Шунингдек, хорижда таълим олиш имкониятлари ҳақида маълумот берувчи ташкилотлар ҳам иштирок этди.

Ўқувчилар учун нима беради?

Тадбирда 1 150 нафардан ортиқ юқори синф ўқувчиси, 300 дан ортиқ мактаб маслаҳатчиси ва 200 га яқин мактаб директори қатнашди. Иштирокчилар университетларнинг қабул комиссиялари вакиллари билан бевосита мулоқот қилиб, таълим дастурлари, қабул талаблари ва ҳужжат топшириш тартиби ҳақида маълумот олди.

• таълим йўналишларини танлаш бўйича маслаҳат;
• қабул талаблари ва ҳужжатлар тартиби билан танишиш;
• халқаро университетлар билан тўғридан-тўғри мулоқот.

Иккинчи куни мактаб маслаҳатчилари учун тренинг ва семинарлар ўтказилди. Уларга ўқувчиларни олий таълим муассасасини танлашда, академик мақсадларни белгилашда ва халқаро университетларга ҳужжат топширишга тайёрлашда ёрдам бериш масалалари муҳокама қилинди.

Бундай учрашувлар иқтидорли ўқувчиларга ўз қобилиятларини тўғри баҳолаш ва келажакдаги таълим йўлини онгли танлашга ёрдам беради.

Манба: Ta'lim va ilm-fan vazirligi