Ёшлар орасида китобхонлик маданиятини оширишга қаратилган янги дастур эълон қилинди. “Миллий китобхонлик ҳаракати” деб номланган бу дастур умумтаълим мактабларининг 1–11-синф ўқувчиларини қамраб олади. Дастурни Ёшлар ишлари агентлиги, Таълим ва илм-фан вазирлиги, Ўзбекистон Ёзувчилар уюшмаси, Республика Маънавият ва маърифат маркази ҳамда Алишер Навоий номидаги Ўзбекистон Миллий кутубхонаси биргаликда амалга оширади.

Танлов қандай ўтади?

Иштирокчилар ёшига қараб уч гуруҳга бўлинади: 1–5-синф, 6–8-синф ва 9–11-синф ўқувчилари. Ҳар бир гуруҳ учун алоҳида адабиётлар рўйхати тайёрланган. Унда ўзбек ва жаҳон адабиётининг болалар ва ўсмирлар учун мўлжалланган бадиий, тарихий ҳамда маънавий-маърифий асарлари ўрин олган.

Танлов электрон платформа орқали ўтказилади. Дастлабки саралашда ўқувчиларнинг тавсия этилган китобларни ўқигани ва мазмунини тушунгани баҳоланади. Кейинги босқичларда тест синовлари, ижодий ишлар ва оғзаки суҳбатлар ўтказилади. Бунда фақат ўқилган китоблар сони эмас, балки асар мазмунини таҳлил қилиш, мустақил фикр билдириш ва нутқ маданияти ҳам эътиборга олинади.

Ғолиблар қандай тақдирланади?

• 1–5-синф ўқувчилари туман босқичигача саралanади. Ғолиблар қимматбаҳо совғалар ва диплом билан тақдирланади.
• Республика босқичида ҳар бир ёш тоифаси бўйича биринчи ўрин соҳибига 50 минг, иккинчи ўрин соҳибига 30 минг, учинчи ўрин соҳибига 15 минг АҚШ доллари миқдорида пул мукофоти берилади.
• “Энг фаол ўқитувчи”, “Энг китобхон мактаб”, “Энг китобхон оила”, “Мақсадга интилувчанлик намунаси” ва “Махсус эътироф” номинациялари ғолибларига 10 минг АҚШ доллари миқдорида пул мукофоти ва диплом топширилади.

Танлов натижаларига эътироз билдириш учун апелляция комиссияси фаолият юритади. Иштирокчилар натижалар эълон қилинганидан кейин 15 кун ичида комиссияга мурожаат қилишлари мумкин.

Дастур китоб мутолаасини ёшлар ҳаётининг ажралмас қисмига айлантиришни мақсад қилган. Ота-оналар ва ўқитувчилар учун бу фарзандларини китобга қизиқтиришнинг яна бир имконияти.

Манба: Oliy ta'lim, fan va innovatsiyalar vazirligi