Yoshlar orasida kitobxonlik madaniyatini oshirishga qaratilgan yangi dastur e’lon qilindi. “Milliy kitobxonlik harakati” deb nomlangan bu dastur umumta’lim maktablarining 1–11-sinf o‘quvchilarini qamrab oladi. Dasturni Yoshlar ishlari agentligi, Ta’lim va ilm-fan vazirligi, O‘zbekiston Yozuvchilar uyushmasi, Respublika Ma’naviyat va ma’rifat markazi hamda Alisher Navoiy nomidagi O‘zbekiston Milliy kutubxonasi birgalikda amalga oshiradi.

Tanlov qanday o‘tadi?

Ishtirokchilar yoshiga qarab uchta guruhga bo‘linadi: 1–5-sinf, 6–8-sinf va 9–11-sinf o‘quvchilari. Har bir guruh uchun alohida adabiyotlar ro‘yxati tayyorlangan. Unda o‘zbek va jahon adabiyotining bolalar va o‘smirlar uchun mo‘ljallangan badiiy, tarixiy hamda ma’naviy-ma’rifiy asarlari o‘rin olgan.

Tanlov elektron platforma orqali o‘tkaziladi. Dastlabki saralashda o‘quvchilarning tavsiya etilgan kitoblarni o‘qigani va mazmunini tushunganini ko‘rsatishi baholanadi. Keyingi bosqichlarda test sinovlari, ijodiy ishlar va og‘zaki suhbatlar o‘tkaziladi. Bunda faqat o‘qilgan kitoblar soni emas, balki asar mazmunini tahlil qilish, mustaqil fikr bildirish va nutq madaniyati ham e’tiborga olinadi.

G‘oliblar qanday taqdirlanadi?

• 1–5-sinf o‘quvchilari tuman bosqichigacha saralanadi. G‘oliblar qimmatbaho sovg‘alar va diplom bilan taqdirlanadi.
• Respublika bosqichida har bir yosh toifasi bo‘yicha birinchi o‘rin sohibiga 50 ming, ikkinchi o‘rin sohibiga 30 ming, uchinchi o‘rin sohibiga 15 ming AQSH dollari miqdorida pul mukofoti beriladi.
• “Eng faol o‘qituvchi”, “Eng kitobxon maktab”, “Eng kitobxon oila”, “Maqsadga intiluvchanlik namunasi” va “Maxsus e’tirof” nominatsiyalari g‘oliblariga 10 ming AQSH dollari miqdorida pul mukofoti va diplom topshiriladi.

Tanlov natijalariga e’tiroz bildirish uchun apellyatsiya komissiyasi faoliyat yuritadi. Ishtirokchilar natijalar e’lon qilinganidan keyin 15 kun ichida komissiyaga murojaat qilishlari mumkin.

Dastur kitob mutolaasini yoshlar hayotining ajralmas qismiga aylantirishni maqsad qilgan. Ota-onalar va o‘qituvchilar uchun bu farzandlarini kitobga qiziqtirishning yana bir imkoniyati.

Manba: Oliy ta'lim, fan va innovatsiyalar vazirligi