Toshkent arxitektura-qurilish universiteti

Orqaga

Oliygohlar 08/01/2025 Toshkent arxitektura-qurilish universiteti

Mustaqil O‘zbekiston Respublikasi o‘zining shonli va sharafli tarixi davrida jahonga namuna qilib ko‘rsata oladigan bir qancha taraqqiyot bosqichlarini bosib o‘tdi. Shu jumladan, iqtisodiyot, siyosat, fan, ta’lim, sport, sanoat, qishloq xo‘jaligi kabi bir qancha sohalarda ulkan muvaffaqiyatlarga erishdi. Ayniqsa, hozirgi kunda qurilish sohasi Vatanimizning har bir hududida barqaror sur’atlar bilan jadal rivojlanib kelmoqda.

Shaxsan O‘zbekiston Respublikasining birinchi prezidenti I.A.Karimovning tashabbusi bilan ulkan ishlab chiqarish korxonalari, ko‘rkam va zamonaviy turar-joy binolari, madaniy-maishiy obyektlar, haybatli ko‘priklar va yo‘llar qurilgan. Bu faoliyatni samarali amalga oshirish uchun me’morchilik va qurilish sohasida chuqur bilimga ega bo‘lgan me’mor, quruvchi hamda muhandislarga bo‘lgan ehtiyoj sezilarli darajada yuqori bo‘lganligi sababli Toshkent arxitektura qurilish instituti tashkil etishga ehtiyoj tug‘ilgan.

Hozirgi vaqtda bu jarayonda jonbozlik ko‘rsatayotgan Toshkent arxitektura qurilish instituti O‘zbekiston Respublikasining birinchi prezidenti I.A.Karimovning 1991-yil 6-maydagi farmoniga binoan Toshkent politexnika universitetining “Arxitektura”, “Sanoat va fuqaro qurilishi” hamda “Muhandis qurilishi” fakultetlari negizida tashkil etilgan. Shuni alohida ta’kidlash zarurki Toshkent arxitektura qurilish universiteti arxitektura va qurilish sohasida tayanch oliy ta’lim muassasasi hisoblanib, ta’lim yo‘nalishlari va mutaxassisliklar uchun davlat ta’lim standartlari, namunaviy o‘quv rejalar, fan dasturlari ishlab chiqishga hamda respublika oliy ta’lim muassasalarida tatbiq etishda doimo tashabbus ko‘rsatib kelmoqda.

2022-yil 8-noyabrda Toshkent arxitektura-qurilish instituti universiteti sifatida qayta tashkil etilib, u muhandislik, arxitektura, qurilish hamda qurilish materiallari texnologiyalari yo‘nalishlariga ixtisoslashtiriladi.

Bugungi kunda universitetda “Arxitektura”, “Bino va inshootlar qurilishi”, “Muhandislik qurilish infrastrukturasi” va “Qurilishni boshqarish” fakultetlari mavjud bo‘lib, ularda “Dizayn”, “Arxitektura”, “Ko‘chmas mulk ekspertizasi va uni boshqarish”, “Qiymat injiniringi”, “Geodeziya, kartografiya va kadastr”, “Bino va inshootlar qurilishi”, “Muhandislik kommunikatsiyalari qurilish va montaji”, “Gidrotexnika qurilishi” kabi 22 ta ta’lim yo‘nalishi bo‘yicha 3958 nafarga yaqin bakalavrlar hamda “Dizayn”, “Geodeziya va kartografiya”, “Bino va inshootlar arxitekturasi”, “Arxitektura nazariyasi va tarixi, arxitektura yodgorliklarini tiklash”, “Landshaftlar arxitekturasi”, “Bino va inshootlar qurilishi”, “Qurilishni tashkil etish texnologiyasi”, “Qurilish iqtisodiyoti”, “Gidrotexnika inshootlari”, “Ko‘chmas mulkni baholash va boshqarish” kabi 23 ta mutaxassislik bo‘yicha 349 nafarga yaqin magistrlar tayyorlanmoqda.

Toshkent arxitektura-qurilish universitetida hozirda quyidagi fakultetlar mavjud:

Muhandislik fakulteti;
Texnologiya fakulteti;
Arxitektura fakulteti;
Menejment fakulteti.

Bugunga qadar universitetida turli sohalar bo‘yicha 35 mingdan ortiq mutaxassislar tayyorlandi va ular mamlakatimizning arxitektura, qurilish va boshqa sohalarni kadrlar bilan ta’minlashga o‘z hissasini qo‘shmoqda.

Bu kadrlar yetarlicha bilim egalari, malakali mutaxassislar bo‘lishlari uchun ko‘p jihatdan o‘z sohasini mukammal bilgan, o‘z kasbini sevgan professor-o‘qituvchilarga bog‘liqdir. Institut rahbariyati professor-o‘qituvchilar ilmiy salohiyatini oshirishga jiddiy e’tibor bermoqda. Yosh kadrlardan ilmiy darajali va ilmiy unvonli, malakali pedagoglarni tayyorlash kafedra va dekanatlar diqqat markazida turibdi. Toshkent arxitektura qurilish universitetida 343 nafar professor-o‘qituvchilar faoliyat yuritib, ulardan 23 nafari fan doktorlari va professorlar, 102 ga yaqini fan nomzodlari va dotsentlar talabalarga ta’lim-tarbiya bermoqdalar. Institut professor-o‘qituvchilarining 36% ilmiy daraja va ilmiy unvonlarga ega.

Universitet professor-o‘qituvchilari tomonidan chop etilgan ishlarga Web of Science, Scopus, Google Scholar tizimlarida 650 dan ortiq iqtiboslik mavjud. Universitet tashkil etilgandan beri, arxitektura va qurilish sohasi mutaxassislarini tayyorlashning dolzarb muammolari bo‘yicha 20 dan ortiq xalqaro konferensiyalar o‘tkazilgan.

Hozirgi kunda qurilish sohasidagi talab va ehtiyojlardan kelib chiqib, Toshkent arxitektura-qurilish universitetida (TAQU) 22 ta bakalavriat ta’lim yo‘nalishlari va 23 ta magistratura mutaxassisliklari bo‘yicha kadrlar tayyorlash yo‘lga qo‘yilgan.

Toshkent arxitektura-qurilish universitetida 2023-2024 o‘quv yili uchun jami 3646 ta qabul kvota o‘rinlari ajratilgan bo‘lib, jumladan: bakalavriat ta’lim yo‘nalishlari uchun 3300 ta va magistratura mutaxassisliklari uchun 346 ta o‘rin ajratilgan. Bakalavriat bosqichi uchun ajratilgan 3300 ta o‘rindan 940 tasi kunduzgi, 350 tasi sirtqi, 1050 tasi kechki, 490 ta ikkinchi va undan keyingi oliy ta’limning kunduzgi hamda 245 ta ikkinchi va undan keyingi oliy ta’limning sirtqi shakllari uchun qabul parametrlari ajratildi.

Shuningdek, Qurolli kuchlar safida muddatli harbiy xizmatni o‘tab, harbiy qism qo‘mondonligining tavsiyanomalari uchun 47 ta, 5 yil stajga ega xotin-qizlar uchun 5 ta, “Mehribonlik uyi” va “Bolalar shaharchasi”ning bitiruvchilari uchun 24 ta hamda “Nogironligi bo‘lgan shaxslar” uchun 47 ta o‘rin ajratilgan.

Universitet mutaxassislari tomonidan qurilish, jamoat va turar-joy binolarini loyihalash, bino va binolarning zilzilalarga chidamliligini aniqlash, texnogen chiqindilar asosida yuqori sifatli qurilish materiallari ishlab chiqarish uchun buyurtmalar qabul qilinadi. Institutning nashriyot-tahririyat bo‘limi tomonidan darsliklar, o‘quv-uslubiy qo‘llanmalar, monografiyalar va ilmiy ishlar to‘plamlari nashr etilgan.

Toshkent arxitektura-qurilish universiteti MDH, Osiyo va Yevropaning 20 dan ortiq yetakchi institut va universitetlari bilan shartnomalar tuzgan. Jumladan xorijiy davlatlarning jami 95 ta nufuzli OTMlari ta’lim va ilmiy hamkorlik aloqalar o‘rnatgan hamda Germaniya, Fransiya, Italiya, Koreya Respublikasi, Xitoy Xalq Respublikasi, Malayziya, Yaponiya, Rossiya Federatsiyasi, Belorussiya, Ozarbayjon, Turkmaniston, Tojikiston va Qozog‘iston kabi respublikalarning qator nufuzli oliy ta’lim va ilmiy muassasalari bilan hamkorlik qilib kelmoqda.

Universitetda qator xalqaro grantlar mavjud. Jumladan, Italiyaning Turin politexnika universiteti, Germaniyaning Vaymar-Bauxaus universiteti, Polshaning Belostok texnika universitetlari bilan hamkorlikda Erasmus+ dasturi loyihalari, Germaniyaning Potsdam amaliy fanlar universiteti bilan hamkorlikda DAAD dasturi loyihalari amalga oshirilmoqda.

Bugungi kunda universitetda MDH davlatlari, Turkiya, Afg‘oniston fuqarolari arxitektura, qurilish, menejment yo‘nalishlarida tahsil olmoqdalar.

Universitetda professor-o‘qituvchilar va talabalar uchun maydoni 1075,2 m2 bo‘lgan axborot-resurs markazi internet tarmog‘iga ulangan zamonaviy kompyuterlar hamda 247 958 dona elektron kitob fondi mavjud. Universitetda sport bilan shug‘ullanish uchun “Paxtakor” sport majmuasi, hududlardan kelgan talabalar uchun yotoqxona, universitetning asosiy binosida oshxona hamda fakultetlarda bufetlar mavjud.