Эндиликда абитуриентлар "юриспруденция" йўналишидаги ОТМларга суҳбат асосида қабул қилинади

Вазирлар Маҳкамасининг "Давлат таълим муассасаларида юридик таълимнинг узлуксиз тизимини жорий этиш ҳамда вояга етмаган ёшларнинг ҳуқуқий маданияти ва саводхонлигини ошириш чора-тадбирлари тўғрисида"ги қарори эълон қилинди. Ушбу қарорга мувофиқ, эндиликда юридик техникумлар негизида Тошкент давлат юридик университетининг академик лицейлари ташкил қилинади. Уларнинг иқтидордли битирувчилари "юриспруденция" йўналишидаги олий таълим муассасаларига суҳбат асосида тест синовларисиз қабул қилиниши тасдиқланди.

Шунингдек, қарорда қуйидаги бандлар ҳам белгилаб қўйилган:

• Мактабларда "Ҳуқуқ синфи" ва ҳуқуқ фанларини чуқурлаштирилган ҳолда ўқитишни ташкил этиш орқали юридик кадрларни тайёрлашда "мактаб–лицей–техникум–университет" тизимини жорий этиш
• Адлия вазирлигининг махсус платформаси орқали ҳуқуқ фани ўқитувчиларининг касбий билим ва кўникмаларини узлуксиз ошириб бориш ҳамда уларни методик таъминлаш тизимини йўлга қўйиш
• Ўқувчилар орасида "Ҳуқуқ билимдони" фан олимпиадаси, ҳуқуқ фани ўқитувчилари орасида "Энг яхши ҳуқуқ ўқитувчиси" кўрик-танловини ўтказиб бориш
• Мактаб ўқувчиларининг ҳуқуқий билимларини мустақил ўзлаштиришига қаратилган кўргазмали ўқув қўлланмалари, видеороликлар, компьютер ўйинлари ва мобил иловаларни яратиш

Ушбу қарор орқали юридик таълимни янада самарали ва узлуксиз қилиш мақсад қилинган. Суҳбат асосида қабул қилиш тизими юридик таълимнинг сифатини оширишга хизмат қилади.