Яримўтказгич технологиялари бўйича халқаро дастурга қабул бошланди
Расм сунъий интеллект ёрдамида яратилган
Таълим ва илм-фан вазирлиги хабарига кўра, микроэлектроника ва яримўтказгич технологиялари бўйича халқаро ўқув дастурига қабул бошланди. Дастур “Эл-юрт умиди” жамғармаси маблағлари ҳисобидан молиялаштирилади.
Дастурнинг мақсади — Ўзбекистонда микроэлектроника ва яримўтказгичлар саноатини ривожлантириш ҳамда халқаро стандартлар асосида малакали муҳандислар тайёрлаш. Дастур давомийлиги 6 ой бўлиб, таълим тили инглиз тили.
Дастур қандай ташкил этилади?
- 3 ой назарий таълим;
- 3 ой Малайзиянинг етакчи компанияларида ишлаб чиқариш амалиёти.
Кимлар ариза топшира олади?
Иштирок этиш учун номзод магистратура босқичида таҳсил олаётган ёки уни тамомлаган бўлиши ҳамда илмий фаолият билан шуғулланаётган бўлиши керак. Ёши 35 дан ошмаган номзодлар қабул қилинади. Дастурга жами 20 нафар квота ажратилган.
Саралаш икки босқичда ўтказилади: аввал ҳужжатлар кўриб чиқилади, сўнгра тест синовлари ва суҳбат ўтказилади.
Ариза топшириш муддати
Аризалар 2026-йил 5-декабргача қабул қилинади. Рўйхатдан ўтиш учун дастур саҳифаси: malasia.tashkenttech-edu.uz. Қўшимча маълумот олиш учун +998 77 288 82 82 рақамига мурожаат қилиш мумкин.
Бундай халқаро амалиёт ёш тадқиқотчи ва муҳандисларга замонавий технологиялар билан танишиш ҳамда хорижий компаниялар тажрибасини ўрганиш имконини беради. Айниқса, яримўтказгич соҳасида илмий иш олиб бораётган магистрлар учун бу ноёб имконият бўлиши мумкин.
Манба: Таълим ва илм-фан вазирлиги
