Bu haqida Maktabgacha va maktab ta’limi vaziri Hilola Umarovaning o‘qituvchilar bilan ayni damda bo‘lib o‘tayotgan muloqotida ma’lum qilindi.

    Vazir  o‘tgan yilda 7 mingdan ortiq davlat va 38 mingdan ortiq xususiy bog‘chalar tashkil etilganini aytib o‘tar ekan, xususiy bog‘chalar faoliyatiga berilayotgan imkoniyatlar sababli qamrov 77% ga oshganini alohida qayd etdi.

Shuningdek, aniqlanayotgan muammolarni ham sanab o‘tdi: 

• - Xususiy bog‘chalarda ijtimoiy himoyaga muhtoj oilalar farzandlarini bepul qamrab olishga yetarli e’tibor qaratilmayapti.
• - Bolalarning real sonini yashirish holatlari bor. 
• - Ba’zi oilaviy bog‘chalarda davomatni sun’iy oshirib ko‘rsatish holatlari mavjud. 
• - Ta’lim va tarbiya jarayonlarida davlat o‘quv dasturlaridan chetga chiqish holatlari uchramoqda. 
• - Bog‘chalarda turli tadbirlarni o‘tkazish, tarbiyalanuvchilarning tug‘ilgan kunlarini dabdaba bilan nishonlash kabi holatlar ham ko‘paygan. 
• -  Ayrim tarbiyachilar bolalarga nisbatan qo‘pollik, tarbiyasizlik holatlari uchramoqda. Vazirlikka yuzlab murojaatlar kelib tushgan. 

   Natijada 32 nafar rahbar va tarbiyachi lavozimidan ozod etildi, 3 nafari javobgarlikka tortildi, 15 nafariga intizomiy chora ko‘rildi, 15 ta xususiy bog‘chaga berilgan litsenziya bekor qilingan.

Vazir o‘z nutqida bolalar bilan yomon munosabatda bo‘lmaslikka chaqirgan.

  «Bir haqiqatni yaxshi anglab olishimiz zarur: bolalarga har qanday shaklda kuch ishlatish, ularni turli usullarda jazolab tarbiyalash aslo mumkin emas.  

  Buni tizimda ishlayotgan har bir rahbar, pedagog, tarbiyachi va yordamchi xodimlar birdek tushunishi, shu tartibga rioya etishlari shart», degan u.