Bugungi kunda raqamli texnologiyalar nafaqat dunyo iqtisodiyotining asosiy ustunlaridan biriga aylandi, balki ularning jamiyatdagi roli kundan-kunga ortib bormoqda. O‘zbekiston ham bu global tendensiyaga qo‘shilib, IT sohasidagi jadal rivojlanish yo‘lida muhim qadamlar tashlamoqda. Joriy yilning 27-fevral kuni Toshkent shahrida bo‘lib o‘tgan “PDP VISION 2030” taqdimoti aynan shu jarayonning ajralmas qismiga aylandi. Tadbirda nafaqat yangi loyihalar e’lon qilindi, balki O‘zbekistonning IT sohasini yangi bosqichga olib chiqish, xalqaro hamkorlikni kengaytirish va innovatsion dasturlarni ishga tushirishga qaratilgan strategiyalar taqdim etildi.

   PDP EcoSystem 2017-yilda tashkil etilgan bo‘lib, o‘tgan qisqa vaqt ichida O‘zbekistonning IT hamda zamonaviy texnologiyalarga ixtisoslashgan yetakchi ta’lim platformasiga aylandi. Bugungi kunda ushbu platforma tarkibida PDP Academy, PDP Online, PDP University, PDP Unicorn, PDP School va PDP Junior kabi loyihalar faoliyat yuritmoqda.

   Tadbir davomida PDP EcoSystem asoschisi, taniqli tadbirkor Odilbek Mirzayev so‘zga chiqib, O‘zbekiston IT sanoatining jadal rivoji va raqamli ekotizimni mustahkamlash yo‘lida amalga oshirilayotgan ishlar haqida ma’lumot berdi. U, shuningdek, "PDP VISION 2030" strategiyasining asosiy yo‘nalishlari va rejalashtirilayotgan loyihalar haqida so‘z yuritdi.

   “Tadbirda taqdim etilgan “PDP VISION 2030” strategiyasi, O‘zbekistonning raqamli texnologiyalar sohasidagi yangi bosqichga o‘tishini ta’minlashga qaratilgan. Bu strategiyaning asosiy yo‘nalishlari sifatida IT ta’limini rivojlantirish, xalqaro hamkorlikni kengaytirish va innovatsion dasturlarni ishga tushirish ko‘zda tutilgan. Tadbir davomida PDP EcoSystem tomonidan e’lon qilingan quyidagi yangi loyihalar ushbu strategiyaning muvaffaqiyatli amalga oshirilishiga xizmat qiladi:

1. PDP College – Zamonaviy IT kasblarini o‘rgatuvchi innovatsion ta’lim maskani. Bu loyiha yangi avlod mutaxassislarini tayyorlashda asosiy rolni o‘ynaydi.

2. PDP Invest – IT startaplarini qo‘llab-quvvatlash va moliyalashtirish platformasi. Bu platforma, investorlar va startaplar o‘rtasidagi aloqalarni mustahkamlashga xizmat qiladi.

3. PDP Synergy – IT mutaxassislarini biznes bilan bog‘lovchi tarmoq. Bu loyiha IT mutaxassislarining biznes dunyosiga integratsiyasini ta’minlashga qaratilgan.

4. PDP Elevator – Yosh iqtidorlarni rivojlantirishga qaratilgan maxsus dastur. Bu dastur orqali yosh startaperlar va iqtidorli yoshlar o‘z g‘oyalarini amalga oshirishda qo‘llab-quvvatlanadi.

  Yuqorida ta’kidlab o‘tgan yangi loyihalar O‘zbekiston IT ekotizimini mustahkamlashga xizmat qiladi. Shu bilan birga, bu loyihalar raqamli texnologiyalarni rivojlantirish va malakali mutaxassislarni tayyorlash jarayonini yangi bosqichga olib chiqadi. “PDP VISION 2030” strategiyasi nafaqat O‘zbekistonning IT sohasining kelajagini belgilash, balki xalqaro miqyosda raqobatbardosh mutaxassislar tayyorlashni ham o‘z ichiga oladi.

Ma’mura To‘rayeva tayyorladi