Ҳар бир миллатнинг куч-қудратини унинг қанчалик салоҳиятга эга эканлигини, ўша миллатнинг адабиёти белгилаб беради. Зеро, Абдулла Қаҳҳор айтганидек ҳақиқатдан ҳам адабиёт атомдан кучли.

 Бундан бир неча йиллар илгари миллатнинг дард-аламини, унинг изтиробларини мадҳ этган ижодкорларни халқимиз ҳалигача миллат маърифатпарварлари сифатида яхши кўришади.

  Ҳурликка интилган Чўлпон, Қодирий, Беҳбудий, Авлонийлар билан ҳали-ҳануз кўксимизни кериб мақтанамиз. XIX асрда айнан жадидчилик намояндалари изидан эргашган, улардек миллат келажаги учун ёниб ижод қилган, сўз санъатининг ҳақиқий усталари бўлган Шавкат Раҳмон, Рауф Парфи, Абдулла Ориф, Экин Воҳидов, Ғафур Ғулом каби қатор шоирлар қайсидир маънода адабиётнинг дарғалари эди.

 Ўтган йилларда жамоатчилик орасида ўзбек адабиётини енгил асарлар эгаллаб олганлиги-ю, ёшлардаги сўзга масъулиятсизлик ҳақида адабиётшунослар томонидан хўб ва кўп айтилди.Айнан ўтган йилларда ўзининг “Кўк бўри” шеъри билан барчанинг эътиборига тушган ёш шоир ижоди кўплаб жамоатчилик вакилларининг бир талай муҳокамаларига сабаб бўлган эди. Жорий йилнинг 12 декабрь куни Ёшлар ишлари агентлиги томонидан ташкил этилган “Мутолаада шеърият” лойиҳасининг навбатдаги меҳмони “Қўрбошилар қўшиғи” номли шеърий дастури билан иштирок этган, умидли ёш шоир Нажмиддин Эрматов бўлди.

 Алишер Навоий номидаги Ўзбекистон Миллий кутубхонасида ташкил этилган тадбир мухлислар ва зиёлилар билан тўлди. Ёш ижодкорнинг ҳақиқий мухлислари тадбирни бошдан охиригача тик туриб кузатишди. Саҳнада мардларча шеър ўқиган шоир елкасида юк бор эди. У юк миллатни уйғотмоқ юки эди. Шоир мардларча шундай дейди:

“Кечанг заволга тўлди ҳамма тош отиб бўлди

Сенинг бор насибангни бекларинг топиб бўлди

Бугундан-ку айрилдинг эртангни сотиб бўлди

Йўл кўрсатар маёғинг ўчганга ўхшаётир...”

Саҳнада шоирнинг қалбида халққа, миллатга бўлган меҳри, дунё ўйинларига бош кўтарган мардона руҳи барчани уйғоқликка чорлади.Дунё ташвишларига берилиб ўзлигини унутган инсонларни шоир шундай ифодалайди.

“Бизга берилган замон,

Сузмакка саёз келди.

Эрк деб уруғ қададик,

Тинмасдан аёз келди.

Тил қантариқ келди ва

Тори узук соз келди.

Умримиз шундай ўтса,

Яшаш бекордир, жўра...”  

Шоир оз бўлса-да олдидаги мақсадини адо этди, ўзининг ўткир сўзлари билан қайсидир маънода уйқуга чўмаётган халқни ва адабиётни ҳақиқатга тик боқиб уйғотди. Шоирнинг ҳис-туйғулари билан суғорилган ва қалбдан чиққан садолари, унинг саҳнада оққан кўз ёшлари бекорга кетмади деб ўйлаймиз. Сиз кутган, мен кутган, бутун миллат кутган адабиёт уйғонди...Саҳналаштирилган шеърлар маҳоратли актёр Эркин Бозоров ижросида янада таъсирли чиқди. Рассом Эркин Оролнинг “Кўк бўри” номли картинаси ўша ерда чизилиб аукционга қўйилди. Картинани ёш шоира Меҳриноз Аббосова 1000 АҚШ долларга сотиб олди ва Миллий кутубхонага совға қилди.Айнан шу картина баҳосининг юқори даражага кўтарилишидан ҳам халқимиздаги санъатга бўлган меҳрини кўришимиз мумкин.

 Маъмура Тўраева