Хабарингиз бор 15 апрелдан 16 майга қадар республиканинг барча ҳудудларида педагоглар аттестацияси ўтказилмоқда. Вазир Ҳилола Умарова ўзининг телеграмдаги расмий саҳифасида тест синовлари якунлангандан кейин овозли чат ташкиллаштириш таклифини билдириб, аттестация юзасидан педагогларнинг фикрларини эшитиш таклифини берган эди. Шунингдек, Ҳилола Умарова аттестацияда 100 фоизлик натижа қайд этган педагогларни ҳам эълон қилди.

  Аммо, бир қанча педагоглар аттестация жараёнларидан норози эканликларини, шунингдек, саволлар жуда қийин тушаётганлигини билдиришмоқда. Шунингдек, география фани ўқитувчилари расмлар сифати пастлиги, саволлар қийинлигидан шикоят қилишган эди.

  Шу боисдан бевосита педагоглар аттестациясига масъул бўлган ва жараённи мунтазам равишда назорат қилиб бораётган вазирликнинг Педагог кадрларга малака тоифаларини бериш жараёнини ташкил этиш бошқармаси бошлиғи Сардор Рахимбоев эса ўзининг телеграмдаги саҳифасида кўпчиликнинг эътирозларига сабаб бўлаётган айрим тест саволларини таҳлил қилиб бермоқда.

  Бугун эса ижтимоий тармоқларда аттестация оид саволларнинг Х вариантлари тарқалгани ҳамда турли ноқонуний ҳаракатлар бўлаётгани ҳақидаги хабарлар тарқалди. Қуйидаги видеода эса, педагог бир вақтнинг ўзида ҳам тест жараёнидаги видеода кўриниб тургани, ҳам ташқарида тургани иддао қилинган.
 

   Ҳолат юзасидан вазирлик матбуот хизматидан маълумот олишга ҳаракат қилдик. Вазирликнинг маълум қилишича, бундай хабарлар ҳеч қандай асосга эга эмас ва ёлғон. Чунки, аттестацияда бериладиган саволлар ҳар икки соатда янгилаб борилади, уларнинг Х вариантлари чиқиб кетиши ёки тарқалиши имконсиз.

  Видеодаги ҳолатга эса вазирлик қуйидагича маълумот берди:

  Ижтимоий тармоқларда Самарқандда малака синовларида қатнашиб чиққан номзоднинг онлайн эфирда ҳали ичкарида турганлиги кузатилгани ҳақида видео тарқалди.

  Аслида мана шундай ҳолатларга барҳам бериш учун ҳам жараён шаффоф тарзда тўғридан-тўғри эфирга бериб турилади.

   Биринчи ҳолатда, видеони кўриб чиқилганда, унда узилиш ва қотишлар бўлгани аниқ кўринади. Тоифа синовлари ўтказиладиган бино ичидаги кузатув камераларининг онлайн эфири https://cams.uzedu.uz веб-сайти орқали амалга оширилади.

   Бироқ, бу сайт РТСП протоколини қўллаб-қувватламагани учун, видео оқим махсус кодировка орқали узатилади.

   Ушбу онлайн трансляция тизимида ҳар 15 сонияда янгиланадиган видео кадрлар сақланади. Сайт компьютер браузерида очилгач, кўрсатилаётган барча кадрлар кеш хотирада (яъни вақтинчалик хотирада) сақланиб қолади.

   Агар интернет алоқаси узилса, браузер автоматик равишда охирги узилмасдан аввал кўрсатилган кадрларни кўрсатишда давом этади.

   Бу муаммони бартараф этиш учун саҳифани оддийгина янгилаш (рефреш қилиш) етарли бўлади. Юқоридаги ҳолатда эса, интерактив панелда интернет алоқаси узилган ва натижада эски, яъни узилишдан олдинги кадрлар экранга чиққан.

   Илова қилинган расмдан кўриниб турибдики, ушбу номзод 52 балл тўплаб аттестациядан ўта олмаган. Шунингдек, номзоднинг тест жараёнида олинган расмлари ва у синовдан кетгандан кейинги ҳолатни кўришингиз мумкин (бутун жараённинг тўлиқ видоэси ҳам мавжуд ва у 1 йил давомида сақланади).

   Шунингдек, Андижон вилоятида ўтказилган аттестация синовларида бошқа бир номзоднинг телефондан фойдаланаётганлиги кузатилган ва ўша куни, яъни 19 апрель куни натижалари бекор қилиниб, четлаштирилган. 

   Маълумотларга кўра, бугунги кунга қадар республика бўйича алоқа қурилмаларидан ёки бошқа воситалардан фойдаланган жами 24 нафар номзод тест синовларидан четлаштирилган.