Ta’lim va ilm-fan vazirligi 2026/2027-o‘quv yili uchun oliy ta’lim tashkilotlarida kontrakt to‘lovlarini amalga oshirish hamda talabalar safiga qabul qilishni rasmiylashtirish muddatini 1-noyabrgacha uzaytirganini ma’lum qildi.

Yangi muddat bakalavriat va magistraturaga o‘qishga tavsiya etilgan abituriyentlarga taalluqli. Shuningdek, o‘qishi ko‘chirilgan yoki ko‘chirib tiklangan hamda o‘qishga qayta tiklangan talabalar ham shu muddatdan foydalanadi.

Qancha to‘lash kerak?

Belgilangan muddatgacha bazaviy to‘lov-kontrakt bo‘yicha yillik qiymatning kamida 25 foizi, tabaqalashtirilgan to‘lov-kontrakt bo‘yicha esa kamida 50 foizi to‘lanishi lozim.

Pedagog xodimlarning farzandlari uchun 30 foizlik imtiyoz

2026/2027-o‘quv yilidan boshlab davlat oliy ta’lim tashkilotlarining bakalavriat bosqichi kunduzgi ta’lim shaklida tahsil olayotgan pedagog xodimlarning farzandlari uchun to‘lov-kontrakt summasining 30 foizini qoplab berish tartibi joriy etilgan. Chegirma olish uchun kontrakt.edu.uz platformasi orqali ariza yuborish kerak.

Eslatib o‘tamiz, sentyabr oyida ham kontrakt to‘lovlari muddati 15-oktyabrgacha uzaytirilgan edi. Muddat tugashini kutib o‘tirmasdan, hujjatlarni oldindan tayyorlab qo‘yish foydali bo‘ladi.

Manba: Daryo.uz