Ta’lim va ilm-fan vaziri Erkinjon Turdimov maktab direktorlarini vazirlik bilan kelishmasdan yig‘ilishlarga chaqirish taqiqlanganini ma’lum qildi. Bu fikr u Samarqandda ta’lim sohasi vakillari bilan o‘tkazilgan uchrashuvda bildirilgan. Ma’lumot Samarqand live Telegram kanali orqali tarqatilgan.

Vazirning so‘zlariga ko‘ra, maktab rahbarlari vaqtini son-sanoqsiz yig‘ilishlarda emas, bevosita o‘z vazifalariga, ya’ni ta’lim mazmuniga e’tibor qaratib o‘tkazishi kerak. U maktab ta’lim bilan, bog‘cha esa tarbiya bilan shug‘ullanishini ta’kidladi. Xo‘jalik masalalari bo‘yicha majlis kerak bo‘lsa, buning uchun zavxoz (xo‘jalik mudiri) mavjudligini aytdi.

Turdimov taqiqqa kim taklif qilishidan qat’i nazar, unga so‘zsiz amal qilinishi kerakligini ta’kidladi.

Xususiy maktab va bog‘chalar litsenziyasi

Uchrashuvda vazir xususiy ta’lim tadbirkorlarining takliflarini tinglab, nodavlat maktab va bog‘chalarni litsenziyalash tartibini qayta ko‘rib chiqish tarafdori ekanini bildirdi. Uning fikricha, SES, qurilish va yong‘in xavfsizligi tashkilotlari ruxsat bergan obyektga vazirlik alohida litsenziya berishi savol tug‘diradi.

Shuningdek, ta’lim tashkilotlarining murojaatlari uchun alohida elektron platforma ishga tushirilishi rejalashtirilayotgani aytildi. Samarqand viloyati Qurilish boshqarmasi faoliyati ham tanqid qilindi. Boshqarma rahbari viloyatda qurilish hujjatlari bo‘yicha 522 ta muammoli masala borligini, ulardan 5 tasi xususiy ta’lim muassasalariga tegishli ekanini ma’lum qildi.

Vazir yangi qonunlar yoki yangiliklar o‘ylab topish shart emasligini, asosiy vazifa esa intizomni yo‘lga qo‘yish va talabchanlikni oshirish ekanini ta’kidladi.

Manba: Gazeta.uz