Umumiy maʻlumotlar

European University Institute (EUI) tomonidan siyosat sohasi boʻyicha mutaxassislar uchun Italiyada xarajatlari qoplanadigan rezidentlik dasturi — Policy Leader Fellowship taqdim etiladi. Florence School of Transnational Governance dastur uchun taxminan 20-25 ta grant ajratishi rejalashtirilgan.

Grant besh yoki oʻn oylik muddat uchun taklif etiladi:

• Besh oylik: 2025-yil sentyabrdan 2026-yil yanvargacha yoki 2026-yil fevraldan 2026-yil iyungacha;
• Oʻn oylik: 2025-yil sentyabrdan 2026-yil iyungacha.

Rezidentlik dasturi Italiyaning Florensiya shahrida oʻtkaziladi.

Maʼlumot uchun: Policy Leader Fellowship (PLF) – Florensiya Transmilliy Boshqaruv Maktabida (STG) oʻtkaziladigan rezidentlik dasturi boʻlib, siyosat sohasida oʻz karyerasining oʻrta bosqichidagi mutaxassislar uchun moʻljallangan. Ushbu noyob dastur Yevropadagi eng mashhur ilmiy muassasalardan birida joylashgan va ishtirokchilarga Yevropa Ittifoqi siyosatini ishlab chiqish jarayonlari haqida ichki maʼlumotlar beriladi.

Dastur butun dunyo boʻylab siyosatni ishlab chiqishda turli amaliy tajribaga ega boʻlgan shaxslarni jalb qilish maqsadi tashkil etilgan va akademik tayyorgarlikni talab qilmaydi. STG va EUI professor-oʻqituvchilari va tadqiqotchilari hamjamiyatiga toʻgʻridan-toʻgʻri kirish imkoniyatidan tashqari, qatnashchilar bir-biridan soha boʻyicha bilim oʻrganadilar va doimiy professional va shaxsiy aloqalarni oʻrnatadilar.

Dastur haqida batafsil ushbu havola orqali maʼlumot olish mumkin.

Maqbullik shartlari

• Siyosat sohasida kamida 10 yillik professional tajribaga ega mutaxassislar qatnashishi mumkin;
• Kamida bakalavr (yoki unga ekvivalent) darajasiga ega boʻlish talab qilinadi (PhD darajasi talab qilinmaydi);
• Ingliz tilini C1 darajada bilish lozim. Quyidagi til bilish sertifikatlari taqdim etilishi mumkin:
  • TOEFL;
  • IELTS;
  • CAE;
  • TOEIC;
  • BEC.
• Ishtirokchilar dastur davomida Florensiya hududida yashashlari kerak. Chunki dasturni onlayn tarzda amalga oshirish mumkin emas;
• Nomzod ochiq fikrli, qiziquvchan, gʻayratli va ish rejasida taqdim etilgan tadbirlarni mustaqil ravishda bajarishga qodir boʻlishi kerak.

Baholash mezonlari:

• Erishilgan yutuqlar;
• Nomzodning yoʻnalishi;
• Ish rejasi. Ariza beruvchilar ish rejasining mazmuni, shuningdek, uning amalga oshirilishi, transmilliy siyosat doirasida qoʻllanilishi va potensial taʼsiri boʻyicha baholanadi.
• Dasturda qatnashishdan maqsadi va amalga oshirmoqchi boʻlgan rejalari.

Eslatma: Arizaning bir qismi sifatida ingliz tili sertifikati soʻralmaydi, lekin muvaffaqiyatli nomzodlar ingliz tilida oʻtkaziladigan suhbatga taklif qilinadi va roʻyxatdan oʻtish toʻgʻrisida sertifikat/tasdiqlovchi hujjat taqdim etishlari soʻraladi.

Foydali tomonlari

• Oyiga 2,500 yevro miqdorida pul beriladi;
• Borish va qaytish uchun safar xarajatlari qoplanadi (maksimal 1,200 yevro):
  • Ekonom-klassdagi aviachipta;
  • Temiryoʻl yoki avtomobil orqali.
• Oilaviy nafaqalar uchun pul ajratiladi (agar mavjud boʻlsa).

Muhim: Talabgor boshqa grant yoki daromad manbaiga ega boʻlsa, barcha maʼlumotlarni oshkor qilishi kerak. Shunda grant miqdori qoʻshimcha daromad miqdoriga qarab (tegishli tasdiqlovchi hujjatlar ishlab chiqarilgandan keyin) pastroq stavkada (oyiga kamida €1,750) belgilanadi.

Hujjat topshirish

Dasturda qatnashishni istaganlar ushbu havola orqali ariza topshirishlari mumkin.

Talab qilinadigan hujjatlar:

• CV (maksimal 3 sahifa);
• Qisqacha tarjimai hol (maksimal 250 ta soʻz). U tanlov jarayoni uchun nomzod profilining qisqacha koʻrinishi boʻlib xizmat qiladi va agar ariza beruvchi dasturga qabul qilingan boʻlsa, aloqa maqsadlarida ham foydalaniladi;
• Ikkita tavsiyanoma (tavsiyanoma topshirish uchun oxirgi muddat 2025-yil 31-yanvar soat 18:00);
• Oliy maʼlumot toʻgʻrisidagi guvohnoma nusxasi;
• Motivatsion xat (maksimal 1000 soʻz) ishtirokchining ariza berishdan asosiy sabablari, dastur davomida amalga oshirilishi kerak boʻlgan maqsadlari, muayyan transmilliy siyosat masalalariga qiziqishi va kelajakdagi professional intilishlari haqidagi maʼlumotlarni oʻz ichiga olishi kerak;
• Ish rejasi (maksimal 2500 ta soʻz);
• Ixtiyoriy ish namunalari (maksimal 2 ta namuna).

Ariza topshirishdan oldin ushbu havolani diqqat bilan oʻqib chiqish, toʻgʻri hujjatlar va maʼlumotlar taqdim etilganiga ishonch hosil qilish kerak.

• Dasturga hujjat topshirish uchun oxirgi muddat: 24-yanvar, 2025-yil;

Kimlar uchun

Oliy ma'lumotli (bakalavr), Magistr talabasi, Oliy ma'lumotli (magistr), PhD talabasi , Falsafa fanlari doktori

Dastur tili

Ingliz tili

Yosh chegarasi

Chegaralanmagan

IELTS talabi

minimum 7

Manba: https://t.me/grantgouz/7424