Олий таълимдаги долзарб масалалар: битирувчиларнинг иш билан таъминланиши ва ўқув адабиётлари
Таълим ва илм-фан вазирлиги йиғилишида олий таълим тизимидаги энг долзарб масалалар муҳокама қилинди. Асосий эътибор таълим сифатини оширишга қаратилди: ўқув дастурларини меҳнат бозори талабларига мослаштириш, талабаларнинг амалий кўникмаларини ривожлантириш ва педагоглар малакасини ошириш зарурлиги таъкидланди.
Битирувчиларнинг иш билан таъминланиши
Тақдим этилган маълумотларга кўра, давлат олийгоҳларининг 2026-йилги битирувчиларидан 13,8 минг нафари ҳозирча иш билан банд эмас. Шу сабабли иш берувчилар билан ҳамкорликни кучайтириш ва кадрлар тайёрлашда иқтисодиёт тармоқларининг эҳтиёжларини ҳисобга олиш масалалари муҳокама қилинди. Битирувчиларнинг иш билан таъминланиши таълим натижадорлигини баҳолашдаги муҳим мезон экани қайд этилди.
Ўқув адабиётлари билан таъминот
Таҳлил қилинган 29,7 минг ўқув адабиётининг 5,5 мингтаси 20 йил аввал чоп этилгани маълум бўлди. Айрим фанлар бўйича эса адабиётлар умуман мавжуд эмас. Шу сабабли ўқув манбаларини янгилаш ва уларни таълим дастурларига мувофиқлаштириш зарурлиги таъкидланди.
Талабалар турмуши ва мурожаатлар
Талабалар мурожаатларини ўз вақтида ҳал қилиш ва топшириқлар ижросини таъминлаш бўйича раҳбарлар масъулиятига эътибор қаратилди. Ётоқхоналар қурилишининг кечикиши ҳамда ижара хонадонларидаги шароитларни ўрганишдаги камчиликлар ҳам муҳокама қилинди.
Ректорларга топшириқлар
Камчиликларни белгиланган муддатларда бартараф этиш вазифаси юклатилди. Ректорларга 15 кун ичида талабалар ва ўқитувчилар учун қабуллар ташкил этиш, уларнинг муаммоларини жойида ҳал қилиш чораларини кўриш ҳамда ойлик, чораклик ва йиллик иш режаларини шакллантириш топширилди. Бундан ташқари, бир қатор олий таълим муассасаларидаги мансабдор шахсларнинг лавозимига лойиқлигини ўрганиш учун ишчи гуруҳ тузиш белгиланди.
Манба: Таълим ва илм-фан вазирлиги