Канадалик олимлар университет талабаларининг интеллектуал даражаси бундан 70-80 йил олдингига нисбатан пасайганини аниқлашди. Ҳозир ўқувчиларнинг IQ даражаси умумий аҳолиники билан деярли бир хил даражада.

Замонавий илмий адабиётларда университет талабаларининг IQ даражаси ўртачадан юқори диапазонда, 115 дан 130 баллгача эканлиги ҳақидаги маълумотларни топиш мумкин. Бироқ, илмий адабиётларга маълумот йиғиш учун талабаларнинг 1940-1950 йиллардаги кўрсатгичлари олинган.

Моунт Рояль, Британия, Колумбия ва Ғарбий (Канада) университетлари олимлари ушбу маълумотларни «янгилаш»га қарор қилишди. 

Муаллифлар 1939 йилдан 2022 йилгача Векслер интеллект шкаласи бўйича синовдан ўтган коллеж ва университет талабалари натижаларининг ўртача IQ кўрсаткичлари мета-таҳлилини ўтказдилар. 

Тадқиқотчилар бугунги кунда олий таълим талабаларининг IQ даражаси ўртача 102 балл атрофида эканлигини ва бундан ташқари, ҳар йили тахминан 0,2 баллга пасаётганини аниқлашди. Талабаларнинг интеллектуал қобилиятлари даражаси, албатта, университетга қараб фарқ қилади.