So'nggi yangiliklardan xabardor bo'ling
Bizning Telegram-kanalimizga obuna bo'ling
Markaziy Osiyoda yetakchi va tayanch oliygoh hisoblanmish Toshkent to‘qimachilik va yengil sanoat instituti o‘zining 90 yillik faoliyati davomida mamlakatimiz iqtisodiyotining muhim tarmoqlari – paxta tozalash, to‘qimachilik va yengil sanoat korxonalari uchun nafaqat yuqori malakali, yetuk mutaxassis kadrlar tayyorlab berish, balki mazkur korxonalarda ishlab chiqarishni tashkil qilish, rejalashtirish va ularni boshqarish, mahsulot sifati va mehnat unumdorligini oshirish, texnik va texnologik asbob-uskunalarni yangilash, bu sohalar bo‘yicha ixtiro hamda kashfiyotlar yaratib, ishlab chiqarishga joriy etish bo‘yicha taklif, fikr va mulohazalar ham berib kelmoqda.
Institutning tashkil etilishiga o‘tgan asrning 20-yillarida Respublikamizda qurib ishga tushirilgan Farg‘ona to‘qimachilik kombinati, Farg‘ona, Buxoro, Samarqand, Marg‘ilon pillakashlik fabrikalari, Marg‘ilon shoyi kombinati va «Atlas» ishlab chiqarish birlashmasi, Toshkent, Buxoro, Samarqand, Qo‘qon, Urganch, Andijon tikuv fabrikalari, Toshkent ko‘n zavodi, poyabzal fabrikasi, ishlab turgan ko‘plab paxta tozalash zavodlari, qurilishi boshlangan Toshkent to‘qimachilik kombinati kabi yengil sanoat korxonalarini yuqori malakali mutaxassis kadrlar bilan ta’minlash zarurati asos bo‘lgan. 
Bunga qadar mazkur korxonalar oliy ma’lumotli mutaxassislar bilan qisman O‘zbekiston Milliy universiteti (ToshDU)ning «Paxtani dastlabki ishlash» kafedrasi (1927-y.), 1929-yilda universitetdan ajralib chiqqan O‘rta Osiyo paxtachilik-irrigatsiya politexnika institutining to‘qimachilik fakultetida, 1931-yildan O‘rta Osiyo mexanika-texnologiya instituti to‘qimachilik fakulteti bazasida, asosan esa sobiq markazdan yuborilgan kadrlar hisobiga ta’minlangan.
O‘rta Osiyo mexanika-texnologiya institutida paxtani dastlabki ishlash va yigirish, to‘quvchilik, ipak texnologiyasi bo‘yicha mutaxassislar tayyorlash yo‘lga qo‘yilgan edi. Mana shu institut va fakultet hamda mutaxassisliklar negizida alohida to‘qimachilik institutini tashkil etish zarurati paydo bo‘lgan.
Shunday qilib, 1932-yil sentyabrdan institut o‘z faoliyatini boshlagan. Dastlabki yil institutda 2 ta fakultet: «Paxtani dastlabki ishlash» va «Mexanikaviy texnologiya» fakultetlari o‘z tarkibida 4 ta mutaxassislik, paxtani dastlabki ishlash, to‘quvchilik, yigiruv va ipak texnologiyasi mutaxassisliklari bilan faoliyat yuritgan.
1935-yilda institutning 4 qavatli o‘quv-laboratoriya binosi (bugungi 2-o‘quv binosi) va talabalar uchun 4 qavatli yotoqxona binosi foydalanishga topshirilgan.
O‘tgan yillar davomida institut katta tarixiy yo‘lni bosib o‘tdi. Yildan-yilga o‘quv-laboratoriya bazasi mustahkamlanib bordi. Masalan, 1935-yilda institutda 6 ta ishlab chiqarish va 5 ta o‘quv laboratoriyalari, 5 ta o‘quv kabineti, sport zali, kutubxona bo‘lgan bo‘lsa, 1960-yillarga kelib mos ravishda 8 ta ishlab chiqarish, 10 ta o‘quv-laboratoriyalari, 13 ta o‘quv kabineti faoliyat ko‘rsatdi. Axborot-resurs markazidagi kitoblar fondi 500 tadan 631 mingga yetdi.
Shuningdek, 1962-yilga kelib, institut tarkibida yengil sanoat tarmoqlari bo‘yicha bir qator yangi ixtisoslik va mutaxassisliklar ochilishi munosabati bilan institut nomiga «yengil sanoat» so‘zi ham qo‘shildi. Natijada, institut faqat «to‘qimachilik» emas, balki «to‘qimachilik va yengil sanoat instituti» nomi bilan atala boshladi. Bu davrda talabalar uchun yana 3 ta talabalar uyi, 1973-yilda 6 qavatli yangi o‘quv binosi (hozirgi 1-o‘quv binosi), keyinchalik «Paxtani dastlabki ishlash» fakulteti o‘quv binosi qurib ishga tushirilgan.
1932-2012 yillarda institut sanoat tarmoqlari uchun 50 mingga yaqin yuqori malakali mutaxassislar tayyorlab bergan. Bular orasida Kuba, Mo‘g‘uliston, Afg‘oniston, Germaniya, Peru, Vetnam, Laos va qator Afrika davlatlarining 800 ga yaqin talabalari ham bor edi.B.A. Levkovich, M.T. О‘razboyev, A. Alimov, N.N. Nazarov, K.M. Mansurov, M.R. Razzoqov, G‘.J. Jabborov, X.Q. Qurbonov, Y.Q. Qirg‘izboyev, G.I. Boldinskiy, R.G‘. Mahkamov, M.M. Ma’rupov, S.X. Xusniddinov, M.M. Muhamedov, M.SH. Tojiyev va boshqa professorlar o‘qituvchilar shu institutda faoliyat yuritgan.
1991-yil 31-avgustda O‘zbekiston Respublikasi davlat mustaqilligining e’lon qilinishi bilan institut tarixida yangi bosqich boshlandi. Mustaqillikning o‘tgan 30 yili ichida institut jamoasi ta’lim-tarbiya jarayonini zamon talablari darajasida qayta qurish, uni yanada takomillashtirib, samaradorligini oshirish, o‘quv-laboratoriya va kabinetlarini yangi, eng zamonaviy kompyuterlar, boshqa asbob-uskunalar bilan jihozlash, ta’lim-tarbiyada milliy qadriyatlar va xalq an’analariga alohida e’tibor berish, talaba-yoshlar ongiga mustaqillik va milliy istiqlol g‘oyasini singdirish kabi masalalarda jiddiy yutuqlarga erishgan.
Bugungi kunda institutning faoliyati quyidagi raqamlarda o‘z aksini topgan:
Hozirda institutda quyidagi 4 ta fakultet, 26 ta kafedralar faoliyat ko‘rsatmoqda
Toshkent to‘qimachilik va yengil sanoat instituti kafedralari;
Toshkent to‘qimachilik va yengil sanoat instituti- to‘qimachilik va yengil sanoat uchun mashinasozlik, trikotaj, to‘quvchilik...., shuningdek, ipak sanoati, kimyo, poligrafiya va qog‘oz sanoati yo‘nalishlarida bo‘yicha bakalavriat bosqichida 12 ta, magistratura bosqichida 21 ta mutaxassisliklar bo‘yicha bakalavrlar, magistrlar, doktorantlar (PhD) va fan doktorlari tayyorlamoqda.
Bundan tashqari hozirda institutda 700 tadan ortiq zamonaviy kompyuterlar institutning barcha kafedra va bo‘limlarida ham mavjud bo‘lib, institut jahon internet tarmog‘iga ulangan. Bu hol masofadan turib o‘qitish va xorijiy axborotlarni tezlik bilan olishda qo‘l kelmoqda.
Mustaqillik yillarida institutning xalqaro aloqalari ham kengaydi. Bugun institut “To‘qimachilik Akademiyasi”, “Matbaa o‘quv yurtlari Assotsiatsiyasi”, “Ipak Assotsiatsiyasi” kabi nufuzli xalqaro uyushmalar a’zosi. U xorijiy mamlakatlarning 20 dan ortiq turdosh o‘quv yurtlari bilan mustahkam aloqalar o‘rnatgan. Bularning orasida Germaniyaning Berg, Belgiyaning Gent, Rossiyaning Moskva to‘qimachilik universiteti va matbaa universitetlari, Sankt-Peterburg To‘qimachilik va yengil sanoat instituti, Ivanovo To‘qimachilik akademiyasi, Kostroma to‘qimachilik universiteti, Gretsiyaning Pirey texnologiya instituti va boshqalar bor.
Toshkent to‘qimachilik va yengil sanoat instituti quyidagi ijtimoiy tarmoqlarda faol faoliyat olib boradi.
Mazkur institut yuzasidan sizda savol va takliflar tug‘ilgan bo‘lsa, quyidagi manzilga va raqamlarga murojaat qilishingiz mumkin:
Bizni kuzatishda davom eting Ta’lim telekanali ta’limdagi eng so‘nggi yangiliklarni har doim siz bilan bo‘lishishga tayyor!
Ma’mura To‘rayeva tayyorladi
#Oliygohlar