✅ Ўтган йилдан буён тестгача фақат фанлар мажмуаси танланадиган бўлди. Қолган муҳим жиҳатлар тестдан кейин танланади.

Хўш, тестдан кейин абитуриент нималарни танлайди?

1️⃣ Биринчидан: бештагача йўналиш танлайди.

Бунда тест топширган фанлар мажмуасига тўғри келадиган ИСТАЛГАН йўналишларни ва ИСТАЛГАН ОТМларни танлаши мумкин.

Кўпчилик рўйхатдан ўтиш чоғида танлаган йўналишини ўзгартирса бўладими, деб сўрамоқда. Бу ҳақда аввал ҳам айтгандик, УзБМБ сайтида фанлар мажмуасини эмас, йўналишни танлайдиган қилишгани учун кўпчилик чалғиб қолди. Лекин сиз танлаган йўналиш ҳеч нарсани англатмайди, шунчаки осонроқ бўлиши учун мисол сифатида қўйилганди холос.

Хуллас, сиз рўйхатдан ўтишда қайси йўналишни танлаганингиз муҳим эмас, тестдан кейин фанларингизга мос келадиган ИСТАЛГАН бештагача йўналишни танлай оласиз.

2️⃣ Иккинчидан, таълим шаклини танлайди.

Бунда квотада ажратилган жойга қараб, кундузги, кечки ёки масофавий шаклни танлаш мумкин. Ёки бешта йўналиш ичида аралаштириб танласа ҳам бўлади. Масалан, 1 ва 2-йўналишга кундузги, 3 ва 4-га кечки ва 5-га масофавий қилиб.

Қайси йўналишда кечки ва масофавий бор-ёки йўқлигини квоталар чиққач билиб олишингиз мумкин. Лекин ҳозирча квоталар тасдиқланмади.

3️⃣ Учинчидан, танлов устуворлигини танлайди.

Бунда танлов устуворлигини ёки давлат грантига, ёки йўналишга қаратиш мумкин. Масалан, кимдир "менга қайси бешта йўналишдан бирига киришимнинг фарқи йўқ, асосийси давлат грантига киришим керак", деса, унда устуворликни грантга беради. Кимдир эса аксинча "мен биринчи танлаган йўналишимга киришим шарт, контрактга кирсам ҳам розиман" деса, унда устуворликни йўналишга беради.

❗️ХУЛОСА: Демак, абитуриентлар 14-23 июль кунлари тестга кириб чиқади. Неча балл олганини эртаси куни билиб олишади. Барча тестлар тугагач, юқоридаги учта масалани танлаш учун 15 кун вақт берилади. 15 кун ўтгач, умумий мандат шакллантириш бошланади. Қоида тариқасида, якуний мандат 1 ҳафта ичида чиқиши керак. Демак, 17 август атрофида мандат чиқиши мумкин.

Олийгоҳларнинг мандати чиқиб бўлгач, ўқишга кира олмаган абитуриентларга коллеж ва техникумларни танлаш учун имконият берилади. Бунга 10 кун вақт ажратилади.