Бухоро давлат университети

Орқага

Олийгоҳлар 24/03/2025 Бухоро давлат университети

Тарихий маълумотларда “Рим тенгдоши”, “Шарқнинг парижи” деб номланган Бухоройи шариф жаҳонда дунёвий ва диний илмларнинг марказларидан бири сифатида машҳур бўлиб келган.

Бухорода олий даражадаги ўқув юртининг ташкил топиш тарихи Масжиди Жоме, Форжақ, Ғарбия, Улуғбек, Мир Араб, Абдулазизхон, Нодир девонбеги, Кўкалдош сингари мадрасалар тарихи билан боғлиқдир. 1920 йилгача Бухорода 127 мадраса фаолият кўрсатган. Бу мадрасаларда Исмоил ал-Бухорий, Абу Али ибн Сино, Абу Бакр Наршахий, Абдухолиқ Ғиждувоний, Баҳоуддин Нақшбанд, Хожа Исмат Бухорий, А.Дониш, С.Айний, А.Фитрат сингари буюк бухорийлар қаторида Шарқнинг Рўдакий, Замахшарий, Умар Хайём, Махтумқули, Б.Кербобоев, Муқимий сингари фозил фарзандлари ҳам таҳсил олганлар.

1922 йилда Бухоро Халқ Жумҳурияти қарори билан Бухоро ва Чоржўйда халқ маорифи институти очилди. Бу – замонавий олий ўқув юрти ташкил этиш йўлидаги дастлабки ҳаракат эди. Ф.Хўжаев ва А.Фитрат шу институт негизида дорилфунун ташкил этиш ғояси билан чиқдилар, аммо БХЖнинг тугатилиши билан бу ғоя амалга ошмай қолди. 1930 йилга келиб эса Бухоро педагогика институти очилди. Институтнинг оёққа туришида А.Фитрат, Миёнбузрук Солиҳов, Мусо Саиджонов, Б.Чўпонзода, И.Кожин, Ф.Трудаков, П.Короленко, Н.Меркулович, В.Абдуллаев, Г.Юсупов каби олимларнинг хизматлари катта бўлди. Иккинчи жаҳон уруши йилларида бир қатор ўқитувчилар ва 47 талаба кўнгиллилар қаторида урушга кетди. Бу мураккаб даврда талабаларни ўқишга кўпроқ жалб этиш мақсадида Қарши, Ғиждувон ва Шофирконда филиаллар очилди. Ҳозирги пайтда мустақил Ўзбекистоннинг етакчи олий ўқув юртлари даражасига кўтарилган Хоразм, Қарши ва Термиз давлат университетлари илк бор филиал сифатида БухДПИ таркибида иш бошлаган эди.

БухДПИ урушдан кейинги йилларда республиканинг етакчи илм масканларидан бири сифатида шуҳрат топди. Президентнинг 1992 йил 28 февралдаги ПФ-356 сонли Фармони ҳамда Вазирлар Маҳкамасининг 1992 йил 11 мартдаги 125-сонли Қарорига асосан унга университет мақоми берилди.

Ҳозирги кунда университетда 9509 талаба таҳсил олади. Бўлажак мутахассисларга 751 нафар профессор-ўқитувчилар фан асосларини ўргатиб келмоқдалар.

Университетда қуйидаги факультетлар фаолият олиб боради:

Физика-математика ва ахборот технологиялари факультети;
Филология факультети;
Хорижий тиллар факультети;
Тарих ва юридик факультети;
Жисмоний тарбия ва спорт факультети;
Иқтисодиёт ва туризм факультети;
Санъатшунослик ва педагогика факультети;
Табиий фанлар ва агробиотехнология факулти.

Ҳозирда Бухоро давлат университетида 6 та факультет, 26 та кафедра бўлиб, уларда 35 таълим йўналиши бўйича талабалар таълим олмоқда. Шу билан бирга, мавжуд 21 ихтисослик бўйича катта илмий ходим-изланувчилик институтида 22 нафар катта илмий ходим-изланувчи ўз тадқиқотларини олиб бормоқда.

Бугунги кунда университет ҳузурида 4 та академик лицей, гимназия, бизнес мактаби, 6 та тил ўрганиш маркази, электрон кутубхона ва ахборот-ресурс маркази, тест маркази фаолият кўрсатмоқда.

Бухоро давлат университетида 7 та хорижий олий таълим муассасаси билан ҳамкорликда 11 та (4 та бакалавр, 7 та магистратура) қўшма таълим дастурлари мавжуд.

Бухоро Давлат университетида 7 та талабалар турар жойи бинолари мавжуд бўлиб, уларда жами 2508 та ўрин талабалар яшаши учун мўлжалланган. 1-6- бинолар сиғими 340 ўриндан бўлиб, жами 2020 ўриндан, 7-бино сиғими 488 ўриндан иборат. Ногирон талабалар учун алоҳида ҳар бир бинода 3 ўринли хона ажратилган. ТТЖ биноларида жами 64 та ошхона мавжуд бўлиб, 128 дона электр плита ва ҳар бир ошхонада 1 донадан жами 64 дона музлаткич ўрнатилган. 8 та кир ювиш хонасида 13 дона замонавий кир ювиш машиналари ўрнатилган. 12 та дазмоллаш хонасида 72 дона дазмол мавжуд. Биноларнинг ҳар бир қаватида ҳожатхона ва ювиниш хонаси (душ) ташкил этилган ва фаолият олиб бормоқда. Талабалар турар жойи фоесида 33 та замонавий компьютер қўйилган ва интернет тармоғига уланган. Биноларнинг ҳар бир қаватида биттадан ҳамда файлларда жами 30 та телевизор қўйилган. ТТЖ биноларининг ҳар бир қаватида маънавият хоналари ташкил этилган.