Agar siz ingliz, fransuz, nemis yoki boshqa biror chet tilini o‘rganish, xalqaro aloqalar yoki diplomatiya sohasida yuqori darajada mutaxassis bo‘lishni orzu qilayotgan bo‘lsangiz, demak, sizni Jahon tillari universiteti kutmoqda!    Universitet tarixiga nazar tashlaydigan bo‘lsak. Bu oliy ta’lim dargohi dastlab 1949-yilda Toshkent chet tillari pedagogika instituti nomi bilan faoliyatini boshlagan. Shundan so‘ng 1992-yil 12-may Toshkent chet tillari pedagogika instituti hamda Respublika Rus tili va adabiyoti instituti birlashib, O‘zbekiston davlat jahon tillari universiteti maqomiga ega bo‘ldi. Universitet o‘zining 74 yillik tarixiga ega.

    Universitetning “Yaxshi aytilgan gap barcha tillarda aqlli eshitiladi...!” degan go‘zal shiori mavjud.

    Bugungi kunda universitetda 24 mingga yaqin talaba 20 ga yaqin xorijiy tilni jahon ta’lim standartlari asosida o‘rganmoqda. O‘zbekiston davlat jahon tillari universitetida asosiy e’tibor filologiya hamda jahon tillarini o‘qitishga qaratilgan bo‘lib, universitetda 29 ta kafedra va 9 ta fakultet mavjud. Fakultetlarning barchasi filologiya sohasi bo‘yicha mutaxassislar tayyorlab keladi.   Hozirgi kunda universitetda quyidagi fakultetlar faoliyat olib boradi:

• Tarjimonlik fakulteti;
• Ingliz filologiyasi fakulteti;
• Ingliz tili birinchi fakulteti;
• Ingliz tili ikkinchi fakulteti;
• Ingliz tili uchinchi fakulteti;
• Roman-german filologiyasi fakulteti;
• Rus filologiyasi fakulteti;
• Sharq filologiyasi fakulteti;
• Media va kommunikatsiya fakultet.

 Har yili universitetda 15 ta ta’lim yo‘nalishida bakalavr, 13 ta ta’lim yo‘nalishida magistrlik darajasiga ega mutaxassislar tayyorlanadi.Universitetdagi ta’lim yo‘nalishlari bilan tanishing:

 Bakalavr yo‘nalishlari:

• xorijiy til va adabiyoti (ingliz tili);
• filologiya va tillarni o‘qitish (ingliz tili);
• filologiya va tillarni o‘qitish (nemis tili);
• filologiya va tillarni o‘qitish (fransuz tili);
• filologiya va tillarni o‘qitish (ispan tili);
• filologiya va tillarni o‘qitish (xitoy tili);
• filologiya va tillarni o‘qitish (koreys tili);
• filologiya va tillarni o‘qitish (yapon tili);
• filologiya va tillarni o‘qitish (rus tili);
• ona tili va adabiyoti (rus tili va adabiyoti o‘zga tilli guruhlarda);
• tarjima nazariyasi va amaliyoti;
• jurnalistika (xalqaro jurnalistika);
• Rus tili va ingliz tilini o‘qitish.

 Magistratura yo‘nalishlari:

• xorijiy til va adabiyoti (ingliz tili);
• adabiyotshunoslik (ingliz adabiyoti);
• lingvistika (ingliz, nemis, fransuz, ispan, xitoy, rus tillari);
• qiyosiy tilshunoslik, lingvistik tarjimashunoslik (tillar bo‘yicha);
• xalqaro jurnalistika (faoliyat turlari bo‘yicha);
• jurnalistika (sport jurnalistikasi).

 Doktorantura – Oliy o‘quv yurtidan keyingi ta’lim institutida katta ilmiy xodim-izlanuvchi va mustaqil izlanuvchilar doktorlik dissertatsiyalarini tayyorlash va himoya qilish maqsadida quyidagi ixtisoslik yo‘nalishlari bo‘yicha ilmiy izlanishlar olib boradilar:

• Til nazariyasi. Amaliy va kompyuter lingvistikasi;
• Yevropa, Amerika va Avstraliya xalqlari tili va adabiyoti;
• Qiyosiy adabiyotshunoslik, chog‘ishtirma tilshunoslik va tarjimashunoslik;
• Adabiyot nazariyasi;
• Jurnalistika;
• Pedagogika nazariyasi va tarixi;
• Ta’limda menejment;
• Ta’lim va tarbiya nazariyasi va metodikasi (sohalar bo‘yicha);
• Xalqaro munosabatlar va tashqi siyosat tarixi;
• Ijtimoiy-siyosiy institutlar va jarayonlar tarixi.

   Mazkur universitet talabasiga aylansangiz sizda chet elda o‘qib malaka oshirish imkoniyati kengroq bo‘ladi. Chunki, O‘zbekiston davlat jahon tillari universiteti bugungi kunda xalqaro aloqalar bo‘yicha ham hamkorlikni keng yo‘lga qo‘ygan. Universitet jahonning 61 ta OTMlari bilan ikki tomonlama hamkorlik shartnomalari asosida faoliyat olib bormoqda.

  Universitet haqida sizda yana savollar tug‘ilgan bo‘lsa quyidagi raqamlarga va manzilga murojaat qilishingiz mumkin:

• Telefon: +998 71 230-12-91
• Elektron pochta: uzdjtu@uzswlu.uz
• Rasmiy sayt: www.uzswlu.uz
• Telegram: @UzSWLU
• Manzil: Toshkent shahri, Uchtepa tumani, Kichik xalqa yo‘li, 21A - uy, pochta indeksi: 100138

   Jahon tillari universiteti — bu nafaqat chet tillarini o‘rganish, balki xalqaro miqyosda tanilib, rivojlanish imkoniyatlarini kashf etish uchun ajoyib joy. Agar siz ham global ta’limni orzu qilayotgan bo‘lsangiz, Jahon tillari universiteti — siz uchun ideal tanlov! O‘qing, o‘rganing, rivojlaning va global maydonda o‘z o‘rningizni toping!

 Ma’mura To‘rayeva tayyorladi.