6 май куни ўтказилган парламент йиғилишида депутат Анвар Темиров Камбағалликни қисқартириш ва бандлик вазирлиги томонидан бажарилган ишларда аниқланган бир қанча камчилик ва муаммоларни санаб ўтган.

Йиғилишда Анвар Темиров вазирлик ҳисоботини кўриб чиққани ва унда бажарилган ишларда камчиликлар кўплигини айтган.

“Вазирликнинг асосий функцияси аҳолини иш билан банд қилиш, камбағалликдан олиб чиқиш бўлади. Ҳисоботда келтирилган рақамлар бунинг аксини кўрсатяпти.

Касб- ҳунарга ўргатадиган мономарказларда ўқитилган фуқароларнинг 74 минг нафарга яқини (30 фоизи) иш билан таъминланмасдан қолган.

Бундан ташқари, бюджет маблағлари самарасиз мақсадларга сарфланган. Аҳоли ўқитиляпти-ю, лекин иш билан таъминламай қоляпти ёки бўлмаса керакли касбга ўргатилмаяпти.

Бунинг энг қизиқ жойи шундаки, баъзи туманлардаги марказлар режани тўлдириш билан банд. Аксинча, булар касбга ўргатиш ва иш билан таъминлашни мақсад қилиши керак.

Режа тўлдириш учун давлат бюджетидан пул сарфламаслик зарур. Нега вазирлик ўзининг энг қуйи қатламигача ислоҳотни тўлиқ етказиб бормаган?

Вазирлик режа тўлдириш билан овора бўлса, эртага аҳоли олдида давлат раҳбари олиб бораётган ислоҳотларига тескари ёндашув бўлиб қолишидан қўрқмайдими? Нега шунча ажратилаётган маблағлардан самарасиз фойдаланилди, нима учун шу кунгача бунинг олди олмади?

Эртага депутатлар ҳудудларга чиқса, фуқаролар олдида жавобгарлигимиз бор, улар савол берганда жавоб беришимиз керак”, – деган депутат.

Бунга жавобан, Бандлик вазири ўринбосари Сирожиддин Бобоқулов айнан қайси касбларга ўқитилганлар ишга жойлашмай қолиб кетганини тушунтирган.

“2024 йил 4 октябрдаги президент қарорига асосан, вазирлик ҳузуридаги касбий кўникма мактаблари сони 75 тадан 65 тага мувофиқлаштирилди.

Ўтказилган таҳлиллар натижасида 2022, 2023 йиллар ва 2024 йилнинг дастлабки олти ойида касб-ҳунарга ўқитилганларнинг 30 фоизи бандлиги таъминланмай қолган.

Уларнинг асосий қисмини ошпазлик, қандолатчилик ва тикувчилик касбларига ўқитилганлар ташкил қилади. Ишга жойлашмаганларнинг аксарияти хотин-қизлар бўлган.

Улар орасида турмушга чиқиб кўчиб кетганлар, уйда бола парвариши билан бандлари, олинган кўникмаларни даромад келтирувчи ишларга эмас, балки ўз оиласи учун татбиқ қилганлари аниқланди.

Бугунги кунга қадар вазирлик тизимида ўқитиш жараёни янгиланди. Оила учун татбиқ қилинадиган касблар режали ўқув дастуридан чиқарилди.

Ушбу йўналишларга фақатгина иш берувчи талабига асосан, яъни иш жойи аниқ бўлгандан сўнг ўқитиш бошланади”, – деган вазир ўринбосари.